Татуластыру шараларын насихаттауға медиаторлар да ынталы

Ел болған соң дау-дамайсыз болмайтыны анық. Бірақ сол жанжалды ушықтармай дер кезінде шешуге қол жеткізу жолдарын дамыту, бүгінгі күнде қай жиынның болса да басты тақырыбына айналып отырғаны белгілі. БАҚ беттерінде де, осы тақырыпта көптеген мақалалар жарияланып, ақпараттандыру шаралары жүргізіліп келеді.Осы орайда, Билер кеңесінің қызметі жайында, сондай-ақ медиацияның мол мүмкіндіктері туралы насихаттау шараларын жүргізуге медиаторлар да ынталылық танытып, ат салысып келе жатқанын да айтып өткен жөн.

«Жақсының жақсылығын айт – нұры тасысын» демекші, өмір мектебінен мол тәжірибе жинақтаған аудандық Билер кеңесінің мүшесі, кәсіпқой емес медиатор, КСРО және ҚР Халық ағарту ісінің озық қызметкері Жолмағамбетов Аманжол ағамыз, қай жиынға да белсенді қатысып, қоғамдағы даукестіктің деңгейін төмендетіп, даулардың келісім арқылы шешілуіне нәтижелі жұмыстар атқарып келеді.

Жергілікті газет беттерінде де, А.Жолмағамбетовтың авторлығымен  «Медиация-бітімгершілікке шақырады», «Медиация-бітімгершілік кепілі» атты мақалалары жарияланған. Ағамыз аудандық «Толқын» газетінің 12 қаңтар 2021 жылғы санындағы «Шәкіртің шықса биікке...» атты мақаласында, аудандық сот ғимаратының жанынан Ұлы даланың аты аңызға айналған үш биіне арналған ескерткіштің бой көтергендігі туралы ақпарат келтірген.

Би ағаларымыздың осындай еңбектерінің арқасында, бүгінде көпшілік Билер кеңесі мен медиаторлар туралы біліп, оларды іздеп, көмегіне жүгінетін болды.

Арал аудандық сотының баспасөз қызметі