26-28 мамыр аралығына арналған ауа-райы болжамы

Алдағы үш тәулікте Қазақстанның басым бөлігінде жауын-шашын болып, дауыл соғады, деп хабарлайды Baq.kz ақпарат агенттігі «Қазгидромет» РМК-ға сілтеме жасап.
Ауа температурасы жылынғандай болғанмен, солтүстік өңірлерде күн салқындай бастайды. Алдағы дүйсенбі күні суық ауа массасы еліміздің шығыс және оңтүстік-шығыс бөлігіне келіп жетеді.
26-27 мамыр аралығында Ақмола облысында онтүстік-батыстан соққан жел солтүстік-шығысқа ауысып, түнде облыстың кей жерлерінде жел секундына 15-20 метр жылдамдықпен соғады. Кей жерлерде найзағай ойнап, дауыл болады және бұршақ жаууы мүмкін.
26 мамырда Қостанай облысының кей жерлерінде тұман түсіп, найзағай ойнайды және дауыл болып, бұршақ жауады. Солтүстік-батыстан соққан жел солтүстік-шығысқа ауысып, аймақтың басым бөлігінде жел секундына 15-20 мер жылдамдықпен соғады.
Ал Солтүстік Қазақстанда ертең солтүстік-шығыстан соғатын желдің күші секундына 15-20 метр жылдамдықпен соқса, кей жерлерде желдің екпіні секундына 23-28 метр аралығындағы болады.
27 мамыр күні кешке қарай Қазақстанның басым бөлігінде жауын жауса, 28 мамырда Алматы, Жамбыл және Шығыс Қазақстан облыстарында көп мөлшерде жауын жаууына байланысты өзен суы тасуы мүмкін.

Baq.kz