Толқын Арал аудандық қоғамдық-саяси газет
» » Берекелі нәсібі – наубайхана кәсібі

Берекелі нәсібі – наубайхана кәсібі

Бұрынғыдай емес бүгінде кәсіп бастауға мемлекет тарапынан біршама мүмкіндіктер қарастырылғаны белгілі. Әр адам сүйікті ісі арқылы өз кәсібін ашып, әрі қарай жандандыра алады. Ауданымызда да сұлулық салоны, кондитерлік және нан өнімдері  секілді түрлі саланы кәсіпке айналдырып отырған жандар жетерлік. Ас атасы нанды пісіріп, кәсіп қылған жандардың бірі – Ерлыбай Бекеев. Ерлыбай өз кәсібі жөнінде:
– Бүгінде кәсіп бастау үшін көптеген мүмкіндік бар. Қай саланың болмасын қиындығы мен қызығы қатар жүреді емес пе?! Кәсіп бастап, оны алып жүрудің де өзіндік қиындықтары да жетерлік. Мен де бұл кәсіпке келмес бұрын қала базарында тұрмысқа қажетті түрлі ірілі-кішілі заттар сатқан болатынмын.  Содан соң араға біршама уақыт салып нан пісіру кәсібіне бет бұра бастадым. Алғаш нанды үй жағдайында пісіріп, шағын кәсібімді бастап жүрдім. Кейін «Бастау бизнес» жобасы арқылы қайтарымсыз грант ұтып алып, нан пісіруге қажетті пеш, миксер сынды түрлі құрылғыларды алып, өз кәсібімді кеңейттім. Күн сайын таң ертемен ыстық нандар қаламыздың дүкен сөрелеріне жөнелтіледі. Міне, осылайша өз кәсібімді ашып, бүгінде несібесін көріп келемін. Осы секілді кәсіп бастаймын деген жандарға үкімет тарапынан қарастырылған көмекке ризамын. Қаншама жастарды жұмыспен қамтып, бизнеске деген сауатын ашып, ел экономикасын дамытып келеді,– дейді.
         Иә, нан – береке. Нан – байлық. Бақытын еңбектен тапқан Ерлыбайға кәсіптік табыс пен береке тілейміз.

А. НҰРЛАНОВА
09 тамыз 2022 ж. 189 0