Тазалық – талап
Биыл айдынды Аралдың 95 жылдық мерейтойы жоғары деңгейде аталып өтілді. Атаулы мерейтой қарсаныңда бірқатар мәдени көпшілік іс- шаралар да жоспарлары түрде қамтылып, халықтың мерекелік көңіл-күйіне айрықша әсер етті. Сондай-ақ туған жерден түлеп ұшқан азаматтар, өнер адамдары, қоғам қайраткерлері Аралға қонақ ретінде шақырылды. Осындай сәтте Арал қаласының таза, келбетінің көрікті болуы – бармашымызға ортақ абырой болып саналады.Әр адам өз қаласының таза әрі көрікті болғанын қалайды ғой. Қонақтар жасыл желекке оранған қызыл гүлдерге толы тарихи ескерткіштері бар, көрнекті жерлерде қыдырып, суретке түсуді құп көреді. Ал біз қаламыздың тазалығына көңіл бөлеміз бе? Аралдың таза қала болу үшін үлес қосып жүрміз бе? Мысалы, паркте серуендеп жүріп шекілдеуік шағып, не ішкен сусынның, жеген чипсидің қағазын әр жерге қойып, не лақтырып кететіндер жоқ емес. Сол жерде тұрған қоқыс жәшігіне салып кетсе, тазалыққа үлес қосар еді. Алайда, кейбір жастардың тазалық мәдениеті көңіл қынжылтады. Қоршаған ортаны таза ұстау, қалдықтарды тастамау әр адамның өз қолында екендігін әрбіріміз біле бермейміз. Табиғат ана берген байлықты қорғау – әрбір азаматтың міндеті. Олай деп айтуымызға да негіз бар. Түрлі өсімдіктер ауаны ластайтын қалдықтарды өз бойына сіңіріп, тіршілікке жаңаша нәрін береді. Сол арқылы барша адамзат баласы тыныстап, өмір сүру қалпын жақсартады. Жалпы бүгінді емес, ертеңді де бір ойлап қойған жөн. Той өтеді, қонақ мақтап кетер. Алайда, тазалық бұдан кейін де керек қой. Сондықтан да айналаны тазартып, бау-бақшаны күтіп-баптап, қоғамдық орындарда тазалық сақтау туған жердің табиғатына деген құрмет екенін естен шығармауымыз керек.«Тазалық – денсаулық кепілі» дейміз. Жүретін жолымызды, демалатын ауамызды, тұратын өлкемізді таза ұстау әр тұлғаның мәдениеттілігін айқындайтын басты қасиет болып табылады. Ендеше табиғатты таза ұстай отырып қаламыздың көркейіп, өсуіне аудан жастарын біркісідей жұмыла атсалысуға шақырамын.
А.Мұратбекқызы
