Ата-ананы қадірлей білейік

Ата-ана – отбасының негізі. Атам қазақ ежелден ата-ананы айрықша құрметтеп, қадір тұтқан. Отбасының шуағы, перзенттерін мейірімге бөлеп, бір қолымен бесікті тербетсе, екінші қолымен әлемді тербеткен асыл да ардақты аналарымыз. Бұл фәниде ана есіміне тең келер ұғым жоқ та шығар. Түн ұйқысын төрт бөліп, бар махаббатын арнап, дүниедегі барлық жақсылықты перзентіне береді, оның өмірде тұлға болып қалыптасуына айрықша үлесін қосады. Баласының бойына өз ұлтының тілін, ділін, салт-дәстүрін, әдептерін сіңіреді. Ал отбасының тірегі, арқасүйері, қорғаны бола білген әкенің орны бір бөлек. Әке – асқар тауымыз.Қазақта «Алты аға бірігіп әке болмас, жеті жеңге бірігіп ана болмас» деп бекер айтылмаған. Адам баласына ана мен әке сөздері қандай асыл мағынаны білдірсе, ата-ана үшін де баласы бауыр еті, өмірінің жалғасы.Жақсылығымызға бірге қуанып, құлағанымызда қолтығымыздан демеушіміз.

Ата-ана тәрбие беруде ұл-қызына үлгі болуы қажет.Жақсылыққа үйретіп,жамандықтың арты неге соқтыратын білдіріп отыруы керек. Пайғамбарымыз Мұхаммед Мұстафа(с.а.у): «Ата-ананың разылығы, Алланың разылығында» дейді. Өз ата-анасына құрмет көрсетпейтін бала, ата-ана алдындағы парызын өтемеген болып есептеледі. Сондықтан да қасиетті Құранда Жаратушымыз бекіткендей құлшылығымызбен қатар ата-анамызға өз құрметімізді, бар жақсылығымызды, сыйластығымызды білдіруіміз керек. Асыл дініміз бізге бұйырғандай барынша ата-анаға құрмет пен кішіпейілдігімізді көрсетуіміз Алланың разылығына бөленуімізге көмектеседі

Қазақта "Атаңа не істесең алдыңа сол келеді" дегендей, бұл фәни дүниеде қазақылықтан танбай, ата-анамызды қадірлей білейік. Үлгілі отбасылардың өнегесін алып, өсіп-өнген ел мақтанар, қызыға қарар әулет болуға талпынайық.Адам баласына ата-анасымен бірге ойнап-күліп бір дастарқан басында емін-еркін әңгіме-дүкен құрып, ақылын тыңдап отырғаннан асқан байлық бар ма?! Өз шаңырағында, өз балаларының ортасында отырып, титтей болса да, естіген жылы сөзіне ештеңе де жетпейді.

Е. ЖАРҚЫНБАЙ