Қаладағы қарбалас
Ақпанда түскен ақ ұлпа әзір жататын болар деп үміттенген едік. Артынша күн сынып қоя берді. Сөйтіп ақ көрпе жамылған Арал әп-сәтте қызыл суға қарық болып, айнала суға, сай-сала лайға айналып шыға келді. Ол аздай жаңбыр себелеп, көктемнің хабаршысына айналған күн райы сезіле бастады. Әрине әр мезгілдің өзіне тән сипаты, айрықша анықтамасы болады. Қыстың соңғы айы қыса ма деген ағайынның үрейлі үміті азайған тәрізді. Өйткені есіктен сығалап көктем келіп тұр. Мұндай мезгілде жердің көбесі сөгіліп, мұз тұрмақ Самарқанның көк тасы еритін шақ. Біз дәл қазір сол мезетте тұрғандаймыз. Айнала еріп, Аралдың орталық көшелері мен ой-шұңқырлары суға толып жатыр. Осындай сәтте тәулік тынысымен жымдасып, уақытпен санаспай жұмыс жасайтын «ARDANA GRОUP» ЖШС және «ҚУАНЫШБЕК» ЖШС мердігерлік ұйымдары қаланы судан тазартуда тынымсыз еңбектеніп жатыр. Қазір қаланың көшелері мен жолдарын толассыз жауған жауын мен еріген қар суынан тазарту үшін 11 арнайы техника жұмыс жасауда. Негізі мақсат – қызыл судан келер қауіпті сейілтіп, үй-жайлар мен көшелерді қаз-қалпында ұстау. Міне, осы бағытта күн-түн демей еңбек етіп жатқан аталмыш мердігерлік ұйымның жұмысына аралдықтардың алғысы ерекше. Лайықты еңбекті бағалау да бір ғанибет. Сол сәттерден сіздің назарыңызға бірнеше кадрлар ұсынып отырмыз.
