Қар мен судан келер қауіп сейілді
Қала тазалығы мен көшелердің көрікті келбетіне жауапты, тіпті табиғаттан келетін тосын жайттардың алдын алуда жұмыс кестесі дегенді білмей жұмыс жасайтын мекемелердің бірі-аудандағы «Арал тынысы» ЖШС-гі. Қашанда қауырт жұмыстың басы-қасында жүріп, былайғы уақытта да аудан тұрғындарының сұранысын қанағаттандыруда үздіксіз қызмет жасап келе жатқан бұл мекеменің қазіргі уақытта да жұмысы саябырлаған жоқ. Себебі, жақында күннің күрт жылынуынан және қыстайғы қардың жылдағыдан мөлшері көп түсуіне байланысты көшелер мен қоғамдық орындарда тіркелген қиын жағдайлар әлі де толықтай қалыпқа келмей жатыр. Оған толассыз жауған нөсер жауынның салдарын қосыңыз. Міне, осындай жағдайлар аталған мекеменің жұмысын қарбаласқа айналдырды. Бұл жөнінде «Арал тынысы» ЖШС-нің директоры М.Баласүгіров:-Нақтысын айтқанда, жыл басталғалы қалада қолайсыз ауа райы салдарынан автокөліктер мен жаяу жүргіншілердің жүріп-тұруында біршама қиындықтар туындады. Қаңтар айынан демалыссыз көше бойларынан трактор, автокөліктер күштерімен қар шығарылып, еріген қар, жаңбыр суларын тарту әлі жалғасуда. Халықтың көп жүретін жолдарын қардан, қатқан мұздан тазарту жұмыстары қол күшімен (лом, балталом, күрек) жүргізілді. Қажетті жерлерге тұз қалдықтары себіліп отырды. Өздеріңіз білесіздер, күн жылыған кездерде кейбір жерлерде қар еріп, оның үстіне жаңбыр жауып халықты әбден әбігерге түсірді. Дегенмен, тез арада тиісті шара қолдану нәтижесінде жеке тұрғын үйлер мен мекемелердің суға кету қауіпі сейілді. Кейбір жерлерге қапшықпен құм тасымалданып, бөгеттер жасалынды. Міне, осы сынды жүргізілген жұмыстар көрсеткіші бойынша қаңтар айынан бастап қаладан 7436 текше метр қар шығарылса, 3160 текше метр су тартылды. 250 қап құм салынған қапшықтар тиісті жерлерге төселсе, ағын суларға бөгет ретінде 21 рет арнайы көліктермен құм тасылды. Осы жұмыстарды жүргізуде «Арал тынысы» ЖШС-нің жұмысшылары мен қоғамдық негізде жұмыс атқарған жандардың еңбегі зор,-дейді.
Хош... Бәрінен бұрын нендей жағдай болмасын халықты ойлайтын биліктің бары бізді қуантады. Осы төтенше жағдайлардың алдын алу мен зардаптарын жоюда билік тарапынан тиісті мекемелерге жан-жақты тапсырмалар беріп, миллиондаған қаржы бөлуінің өзі қарапайым халықтың көңілін бір серпілтері анық. Міне, сол жүргізілген жұмыстардың арқасында бүгінде жағдай қалыпты. Яғни, қар мен судан келер қауіп сейілді деуге болады.
А.Қарасай.
