Көптің таңдауы «Толқында»

Әдетте апта басы қызу жұмыстың қарқын алып, қарбалас болатын кезі. Газет жұмысымен жүрсек те редакцияға келген әрбір оқырманмен жылы тілдесіп, мүмкіндігінше бағыт-бағдар сілтейміз. Бұл жолы руханияттың сөнбес ошағы, ғасырлық ғұмырға ие «Толқын» газетінің табалдырығын Асқар Жұбанышев есімді ағамыз аттады. Таң азанмен ойға алған алғашқы жұмысы алдымен газетке жазылу болыпты. Және бірден 1 жылға. Есен-саулық сұрағанымызда, «Толқын» деген – жақсы газетке жазылуға келдім» деп жылы лебіз білдірген ағамыздың бұл жолғы таңдауы да сүйікті басылымы «Толқын» екенін жазбай білдік.Заманында еңбек майданында шыңдалып, осы аудандағы кеме жөндеу зауыты және балық зауыттарында еңбек еткен қарт оқырман қазіргі таңда қаладағы өзі тұратын Ғ.Мұратбаев көшесінің көше комитеті төрағасы екен. Жасы егде тартса да елдің өмірінен тыс қалмай, мерзімді жаңалықтардан уақытылыхабардар болу үшін «Толқынды» асыға парақтайтын оқырманнның патша көңілі біздің жұмысымызға серпін бергендей болды.
– Өзім тұратын Мұратбаев көшесінде 96 түтін бар. Соның барлығы газет оқиды деп айта алмаймын. Десе де, көпшілігі газетке жазылады. Онда да тұрғындардың да таңдаулы газеті осы «Толқын» деп айтқан болар едім. Біз секілді жасымыз келген адамдар үшін газеттің орны қашанда бөлек. Өз басым интернет пе, сайт па сондай дүниелерді көп түсіне бермеймін. Қолымызға қысып, парақтап оқыған әрбір мақаланың парқы бар біз үшін. Сол үшін газетке жазылу менің жылдағы жауапты жұмысыма айналған. Басқа басқа, өз басым «Толқынға» сонау жас күнімнен жазылып келемін. Таңдаулы басылымға деген құрметім осылай жалғаса бермек, – дейді оқырманымыз.
Иә, бір кездері дәурені жүріп, көптің ыстық ықыласына ие болған басылымның беделі әлі де тұғырдан тая қойған жоқ. Газетті гаджетке алмастырғанмен, оның да өз оқырманы бар. Сол газетке жазылу әлі де жүріп жатқанын көптің есіне салғымыз келеді. Сіз де жазылыңыз, оқырман! Таңдауыңыз «Толқынға» түссе, нұр үстіне нұр болар еді.
А. ҚАРАСАЙ