Ең бастысы – елдің амандығы

Еліміздің солтүстік және батыс өңірлерінде болып жатқан су тасқынына қатысты бүгін Мемлекет басшысы Қасым-Жомарт Тоқаев арнайы үндеу жасап, барша қазақстандықтарды тосыннан келген табиғи аппатың салдарымен бірге күресуге шақырды. Әрине, бастысы азаматтарымыздың өмірі қымбат. Сол үшін болып жатқан жанталастың барлығы да ел бірлігін айқындап отыр. Мұны Президент те айтып, осындай қысыл-таяң сәтте біріге білген отандастамызға ризашылығын білдірді.

– Құтқарушыларға, тәртіп сақшыларына, волонтерлерге және апатпен күресуге атсалысып жатқан барша жұртқа алғысымды айтамын. Осындай қиын-қыстау кезде бір жағадан бас, бір жеңнен қол шығару айрықша маңызды. Бір ел, бір халық болып жұмылып, бұл апатты еңсереміз. Бұл біздің қолымыздан келеді, – деді Мемлекет басшысы.

Иә, сын сағатта сыналып жатқан ағайынға Алла жәрдемші болсын. Мұндайда бір қолдың саласында біріге білетін еліміз қолдан келген көмегін көрсетіп жатыр. Біз де мұндай қайырымдылық шараларынан қалыс қалмауға тырысамыз. Ең бастысы елдің амандығы. Осы бағытта жан-жақты жұмыс істеп жатқан барша азаматтарға Алла разы болсын!

А.ТӨЛЕБАЕВ,

аудандық мәслихат депутаты, кәсіпкер