Кәсіпкерлікке қолдау: болашаққа салынған инвестиция

Кәсіпкерлік – кез келген мемлекеттің экономикалық дамуының қозғаушы күші екені анық. Ол жаңа жұмыс орындарын ашып ғана қоймай, қоғамның әлеуметтік тұрақтылығын нығайтады, сонымен бірге халықтың әл-ауқатын арттырады. Сол үшін кәсіпкерлікті қолдап, оны дамыту мемлекеттік саясаттың басты басымдықтарының бірі. Оны қолдау – ел экономикасының болашағына жасалған инвестиция. Шағын және орта бизнестің дамуы арқылы халықтың тұрмыс деңгейі жақсарып, мемлекет бәсекеге қабілеттілігін арттыра алады.
         Аудан бойынша да кәсіпкерлікті қолдап, оны дамыту бағытында көптеген жұмыстар атқарылып келеді. Аудандар арасында бірінші болып бюджеттен қаржыландырмай-ақ, демеуші кәсіпкерлердің қолдауымен, «Кәсіпкерлер үйі» ғимараты ашылып халыққа қызмет көрсетіп жүр. Атаулы ғимаратта  аудандық жер және ауылшаруашылық бөлімі, кәсіпкерлік өнеркәсіп бөлімі,  кәсіпкерлерге қызмет көрсету орталығы, "Атамекен" кәсіпкерлер палатасы филиалы орналасқан.  Ісін жаңа бастаушы, сондай-ақ жұмыс жасап жүрген кәсіпкерлерге құқықтарын қорғау, мемлекеттік бағдарламалар аясында кеңес ,несие алуға сүйемелдеу, тегін сервистік қызметтер көрсетіліп келеді.
            – Осы 2025 жылдың жарты жылдығы бойынша аудандық палата тарапынан кәсіпкерлерге және кәсіпкерлік бастамасы бар 165 азаматтарға 495 қызметкөрсетілген және 152 кәсіпкерге бизнес жоспар дайындалды. Жалпы аудан бойынша кәсіпкерлерді несиелеу бағытындағы жұмыстар аудандық кәсіпкерлік және ауылшаруашылық бөліммен бірге атқарылуда. Жыл сайын «Атамекен» ҰКП кадрларға қысқа мерзімді және ұзақ мерзімді болжамды қажеттілікті айқындау, кадрларды даярлаудағы сұраныс пен ұсыныс арасындағы теңгерімді айқындау мақсатында жұмыс берушілер арасында сауалнама жүргізеді. Сауалнама нәтижелерімен анықталған облыс бойынша ТОП 20 мамандықтар бойынша Палата тарапынан облыстық білім басқармасына техникалық және кәсіптік білім беру ұйымдарына мемлекеттік тапсырысқа ұсыныс берілді. Ерте кәсіптік бағдар беру адами капиталды қалыптастырудың маңызды кезеңі болып табылады. Осы орайда бұл жұмыс кәсіпорындар мен мекемелерге экскурсиялар, ашық есік күндері және қонақ дәрістер бағыттарында жүзеге асырылады, – деді Арал аудандық "Атамекен" ұлттық кәсіпкерлер палатасының филиал директоры Нұрсәуле Ембергенова.
         Қазіргі заманда қоғамның дамуы мен экономикасының өркендеуі үшін тек білім алып ғана қою жеткіліксіз. Жастардың бойында кәсіпкерлік қабілеттерді дамытып, оларды дербес шешім қабылдауға, жаңа идеяларды жүзеге асыруға баулу – уақыт талабы. Болашақтың табысты азаматы – өз кәсібін дөңгелетіп, елдің өркендеуіне үлес қоса алатын жас кәсіпкерлер. Ауданда да бұл бағытта жұмыстар атқарылып, оң нәтиже көрсетуде.
  – Жыл басынан бері  аудандағы 25 мектептің 1000-ға жуық оқушысы өңіріміздің кәсіпорындары мен мекемелерінің жұмысымен танысты. Облысымыздың 20 кәсіптік және техникалық білім беру ұйымдарында мектеп оқушыларына ашық есік күндері ұйымдастырылды. Экскурсиялар мен ашық есік күндері барысында оқушыларға технологиялық процестер мен оларды жүзеге асыратын мамандар қызметі көрсетілді. Оқушылар тарапынан қойылған сұрақтарға кәсіпорын мекемелердің мамандары жауап беріп, оқушылардың мамандықтарға деген көзқарасын қалыптастыруға өз үлестерін қосты, – деді Нұрсәуле Сайлауқызы.
         Мемлекет басшысы Қасым-Жомарт Тоқаев: "Мемлекеттік аппарат әрбір бизнесменге заң бұзушы ретінде қарамауы керек. Мұндай ұстаным, түптеп келгенде, басқарудың репрессивті сипатына алып келеді. Мемлекет кәсіпкерлерге көмектесуге міндетті. Тағы да ерекше атап өткім келеді. Көмектесуі керек", – деген болатын Президент Ақордада отандық бизнес өкілдерімен кездесуінде. Иә, кәсіпкерлердің құқығын қорғау тек бизнестің ғана емес, бүкіл ел экономикасының тұрақты дамуына әсер етері сөзсіз. Құқықтары қорғалған кәсіпкер батыл қадам жасап, жаңа жобаларды іске асырады, сондай-ақ инновация енгізеді және елдің өркендеуіне үлес қосары анық. Бұл туралы Арал аудандық "Атамекен" ұлттық кәсіпкерлер палатасының филиал директоры Нұрсәуле Ембергенова:
         – Кәсіпкерлер палатасының басым бағыттарының бірі – бизнесті қорғау және бизнестің дамуына кедергі келтіретін әкімшілік кедергілерді анықтау. Филиал Қызылорда облысының Өңірлік кәсіпкерлер палатасымен, аудандық прокуратурамен, сондай-ақ жергілікті атқарушы органдармен кәсіпкерлердің құқықтары мен заңды мүдделерін қорғау және өңірде кәсіпкерліктің табысты дамуына кедергі келтіретін әкімшілік кедергілерді анықтау және жою бойынша тұрақты жұмыс жүргізеді. Осы мақсатта филиалда «Прокуратура» жұмыс істейді, өтініштер түскен кезде аудан прокурорлары туындаған мәселелерді жедел шешу үшін аудан кәсіпкерлерін қабылдайды. Сонымен бірге аудандық палата алаңында заңнамаларға түсіндірме жасау мақсатында аудан кәсіпкерлеріне аудандық кірістер басқармасы, аудандық санитарлық эпидемиологилық бақылау басқармасы, аудандық кәсіпкерлік бөлімі мен бірлесіп жыл басынан 6 дөңгедек стол және де ашық есік күндері ұйымдастырылды, – деді.
            Биылғы жылы 2 шілде күні Қызылорда қаласындағы «Өнер орталығы» ғимаратында «Бір ауыл – Бір өнім» жобасы негізінде өңірлік көрме өткізілген. Бұл жобаның басты мақсаты – ауыл тұрғындарының кәсіпкерлік әлеуетін арттыру, қолда бар табиғи және жергілікті шикізатты тиімді пайдалана отырып, сапалы өнім өндіруге жағдай жасау екен. Сонымен қатар, ауылдық елді мекендерде жаңа жұмыс орындарын ашып, халықтың әлеуметтік-экономикалық жағдайын жақсарту көзделеді. Көрмеге 50-ге жуық жергілікті кәсіпкер қатысқан. Оның ішінде Арал ауданынан 6 кәсіпкер, өз өнімдерін қала тұрғындарына таныстырған. Келушілерге сүт, ет, шұжық, балық, бал, шай, тәттілер сынды тағам өнімдерінен бастап, аң терісі мен қой жүнінен жасалған бұйымдар, сондай-ақ химиялық өнімдер ұсынылған. Көрмеге келген қала тұрғындары жергілікті өндірушілермен тікелей пікірлесіп, олардың еңбегіне қолдау білдіріп, отандық өнімді тұтынуға қызығушылық танытқан екен.
         Алдағы уақытта «Бір ауыл – Бір өнім» жобасы аясында Палата жанынан құрылған жұмыс тобы қатысушылардың жұмыстарын бағалап, үздік деп танылған 10 өнімді арнайы бренд-комитеттің қарауына ұсынбақ.«Қазақстанның үздік тауары – 2025» көрме-байқауының аясында «Кәсіби маман» конкурсының жеңімпаздары марапат төрінен көрінген.
         – Жұмысшы мамандықтар жылы аясында «Атамекен» Ұлттық кәсіпкерлер палатасымен техникалық және кәсіптік білім беру ұйымдары, кәсіпорындар мен тәлімгерлер арасында Республикалық «Кәсіби маман» конкурсы ұйымдастырылған болатын. Көрме аясында осы конкурстың өңірлік деңгейдегі жеңімпаздары марапатталды. Жұмысшы мамандықтар жылы аясында «Атамекен» Ұлттық кәсіпкерлер палатасымен техникалық және кәсіптік білім беру ұйымдары, кәсіпорындар мен тәлімгерлер арасында Республикалық «Кәсіби маман» конкурсы ұйымдастырылған болатын. Көрме аясында осы конкурстың өңірлік деңгейдегі жеңімпаздары марапатталды. «Өндірістегі үздік тәлімгер-2025» номинациясы «Арал» «Мүгедектігі бар адамдарды қолдау» қоғамдық бірлестігінің директоры Индира Жұмашеваға берілді, – деді Нұрсәуле Сайлауқызы.
         Кәсіпкерлік саласында кездесетін ең үлкен кедергілердің бірі – сыбайлас жемқорлық. Ол әділ бәсекелесті тежеп, бизнестің дамуына кері әсерін тигізеді. Бұл бағытта ауданда тұрақты бақылау жұмыстары жүргізіліп келеді. «Ұлттық кәсіпкерлер палатасы туралы» ҚР Заңына сәйкес «Атамекен» ҚР Ұлттық кәсіпкерлер палатасының нақты салаларда сыбайлас жемқорлықтың таралуына талдау және зерттеу барысында анықталған проблемалар бойынша нақты практикалық шараларды әзірлеуге бағытталған «Іскерлік ахуал» тәуелсіз рейтингі бойынша  тоқсан сайын Арал ауданы бойынша тұрақты респонденттерге сауланамадан сапалы өткізілуде.
         – Ағымдағы жылдың 27 қаңтарында Арал  аудандарының кәсіпкерлер кеңесі  бекітілді. Кеңіс төрағасы «Арал құрылысы» ЖШС директоры Құлмырзаев Мейрамбек Оразғалиұлы болып сайланды, кеңес құрамына ауданымыздың 7 кәсіп иесі кіреді олардың 1 әйел 6 ер адам. Кеңес бегітілген жоспар негізінде жұмыс атқарып келеді, – деді Нұрсәуле Ембергенова.
         Елімізде кәсіпкерлікті қолдау мақсатында түрлі бағдарламалар жүзеге асырылуда. Жас кәсіпкерлерге арналған гранттар, жеңілдетілген несиелер, оқыту курстары барлығы да жаңа бастамаларға жол ашады. Бұл – мемлекет тарапынан жасалып жатқан үлкен мүмкіндік!
А.НҰРЛАНОВА

Фото: автордан