Жануарларды қорғау – табиғатты қорғау

Жер бетінде тіршілік етіп жатқан әрбір жануардың табиғаттағы өз орны бар. Бірі өсімдіктердің таралуына ықпал етсе, бірі табиғи тепе-теңдікті сақтайды. Ал кейбір жануарлар – тұтас бір экожүйенің ажырамас бөлігі.Сондықтан, Дүниежүзілік жануарларды қорғау күні – табиғаттағы тіршілік иелеріне деген жауапкершілігімізді тағы бір мәрте еске салатын маңызды күн.Бұл күн бізге жануарларды қорғау тек сирек кездесетін түрлерді сақтаумен шектелмейтінін түсіндіреді. Табиғаттағы әрбір тіршілік иесі қоршаған ортамен тығыз байланыста өмір сүреді. Бір түрдің азаюы немесе жойылуы басқа түрлерге де әсер етіп, табиғи тепе-теңдіктің бұзылуына әкелуі мүмкін.
Арал өңірінің табиғаты – осындай нәзік тепе-теңдіктің айқын көрінісі. Осы кең даланың төрінде орналасқан Барсакелмес мемлекеттік табиғи қорығы – жануарлар дүниесін сақтауға бағытталған маңызды табиғи аумақтардың бірі.Қорық аумағында шөл және шөлейт экожүйелеріне бейімделген көптеген жануарлар мекендейді. Солардың ішінде құлан, қарақұйрық сияқты жануарлардың орны ерекше.Құлан – Барсакелместің табиғи символына айналған жануарлардың бірі. Кең даланың еркін тіршілігімен астасып жатқан бұл жануарды табиғи ортада көру – табиғаттың шынайы күшін сезінуге мүмкіндік береді. Ал қарақұйрықтың тіршілігі де осы өлкенің табиғи экожүйесімен тығыз байланысты.
Бірақ табиғаттағы әрбір жануардың тағдыры тек қорық қызметкерлеріне ғана байланысты емес.Оларды қорғау – бүкіл қоғамның ортақ міндеті.Адамдардың табиғатқа деген көзқарасы өзгермейінше, жануарларды қорғау ісінде тұрақты нәтижеге қол жеткізу қиын. Табиғатқа шыққанда қоқыс қалдырмау, жануарларды мазаламау, олардың мекен ету ортасына зиян келтірмеу, заңсыз аңшылыққа жол бермеу сияқты қарапайым ережелердің өзі үлкен маңызға ие.

Бүгінгі таңда табиғатты қорғау жұмыстары ғылыми зерттеулермен, мониторингпен, экологиялық ағартумен және табиғи аумақтарды қорғаумен қатар жүргізіледі. Бұл бағыттардың барлығы бір мақсатқа – табиғи байлықты келешек ұрпаққа аман жеткізуге бағытталған.Балаларға жануарларды таныстыру, олардың табиғаттағы маңызын түсіндіру де аса маңызды. Себебі табиғатты сүйетін ұрпақ тәрбиелеу – жануарларды қорғаудың ең сенімді жолдарының бірі.Табиғат бізден үлкен нәрсе сұрамайды. Оған тек қамқорлық, жауапкершілік және құрмет қажет.Дүниежүзілік жануарларды қорғау күні – осыны еске салатын ерекше күн.
Табиғатты қорғау – баршамызға ортақ парыз.

А. Жеткер
Барсакелмес мемлекеттік
табиғи қорығы