Ұлттық чемпионат үздігі

Мемлекет басшысы Қасым-Жомарт Тоқаев биыл "Әділетті Қазақстан: заң мен тәртіп, экономикалық өсім, қоғамдық оптимизм" атты Қазақстан халқына Жолдауында "Кәсіптік білім беру саласына реформа жасау – айрықша өзекті мәселе. Бұл – экономиканың өсімін қамтамасыз ету және инвестициялық тартымдылығын арттыру үшін аса қажет қадам. Мен 2025 жылды Жұмысшы мамандықтары жылы деп жариялаймын. Осы уақыт ішінде техникалық және кәсіби білім беру жүйесін реформалау қажет. Сондай-ақ біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз" деген болатын.

Жақында еліміздегі жұмысшы мамандықтар даярлайтын оқу орындары мен білім алушылардың әлеуетін анық аңғартатын шараға куә болдық.

Нақтырақ айтсақ Астана қаласында еліміздегі техникалық және кәсіптік білім беру оқу орындарында білім алатын студенттер арасында «WorldSkills Kazakhstan-2024 Ұлттық кәсіби шеберлік чемпионаты» мәреге жеткен болатын. Оған еліміздің барлық өңірлерінен 30 құзыреттілік бойынша 555-ке жуық колледж студенттері қатысты.

WorldSkills қозғалысы – жұмысшы мамандықтарының мәртебесін арттырудың негізгі құралдарының бірі. Ол кәсіби құзыреттіліктер мен дағдыларды жетілдіру бойынша 89 елді біріктіреді. Қазақстан оған 2014 жылдан бастап халықаралық қозғалыстың толыққанды мүшесі болып табылады, ал 2016 жылдан бастап WorldSkills Europe ұйымының мүшесі.

Осы чемпионатқа «Кірпіш қалау» құзыреттілігі бойынша Қазалы агротехникалық колледжінен бас сарапшы болып Қайрат Айтпаев, Арал көпсалалы колледжінің өндірістік оқу шебері Гафур Назаровтың жетекшілігімен қатысқан Арал көпсалалы колледжінің түлегі Дарханбек Жұманов «Үздік шебер» медалін жеңіп алды. Біз әріптесіміз бен қатысушы түлегімізге алдағы уақытта да үлкен жетістіктерге жетуіне тілектеспіз.

Гүлнар НҰРЫМБЕТОВА,

Арал көпсалалы колледжінің арнайы пән оқытушысы