ҚҰС ӨСІРУДІ ҚОЛҒА АЛДЫ
Кейінгі жылдары кәсіпкерлік саласына жасалып жатқан жан-жақты қолдаулардың арқасында ауданда оңды өзгерістер көрініс беріп келеді. Соның бірі, Арал қаласының тұрғыны Гүлнар Әлібаева мемлекеттік бағдарламаның арқасында қаз өсіруді қолға алды. Нақтырақ айтсақ, жеке кәсіпкер «Нәтижелі жұмыспен қамтуды және жаппай кәсіпкерлікті дамытудың 2017–2021 жылдарға арналған бағдарламасы» негізінде 2017 жылы Қызылорда өңірлік инвестициялық орталығынан қаз фермасын салу үшін 16 млн теңге қаражат алған. Кәсіп иесі шаруасын дөңгелетуге бағытталған несиені орталық тарапынан 6 пайызбен 6 жыл мерзімге рәсімдегенін, сонымен қатар, 1 жылға жеңілдетілген үзіліс алғандығын да жеткізді.Осылайша құс өсіруге бет бұрған кәсіпкерге Арал ауданының Ақирек ауылдық округінің тұсынан нысан құрылысын салу үшін аукцион арқылы 50 га жер телімі табысталған. Фермаға ауыз су, аяқ су көздері де, электр энергиясы және «Батыс Қытай – Батыс Еуропа» автокөлік дәлізі де жақын орналасқан.Қазіргі күні, ауыл шаруашылығы бағытындағы нысанның 80 пайызға жуығы атқарылып, құрылыстың негізгі бөлігі іске қосылып та үлгерген. 3000 басқа арналған қаз фермасында бүгінде Ресей Федерациясының Башқұртстан елінен жеткізілген қаздың «Линда» түрінен 1300 бас балапан өсірілуде.
Осы орайдағы жұмыс барысымен күні кеше аудан басшысы М.Оразбаев арнайы танысып қайтты. Қаз фермасындағы тынымсыз тірлікке куә болған аудан басшысы өңірімізде дәстүрлі емес кәсіптің осы бір түрін дамытуға бел шешкен кәсіпкерге тірлігінің түлеп, ісінің ілгерілеуіне тілектес екенін жеткізді.
Ия, адам денсаулығына пайдасы зор құс етіне сұраныс та мол. Сондықтан фермер кәсібін одан әрі кеңейтуді мақсат етіп отыр. Бұл бағытта фермер өзіне тиесілі жер аумағына қаздарға қысқы мезгілге азық дайындау үшін арпа, бидай, жүгері, жоңышқа егуді де жоспарлап қойған.
Осы ретте, өз кәсібіне ерекше ықыласты Гүлнар Әлібаева:
- Бүгінде әрбір ел азаматына өз кәсібін игеруге мемлекет тарапынан барынша жағдай жасалып отыр. Мәселен, өз басым өңірлік орталық тарапынан несиелендіруге қатысты ешқандай әкімшілік кедергілерге кездеспей, екі апта ішінде толық қаражат алуға қол жеткіздім. Жалпы, өңірлік инвестициялық орталықтың кәсібін енді бастағалы жүрген азаматтарға тигізер пайдасы, әрі қамқорлығы өте зор, -дейді.
