Егемендік пен Елбасы – егіз ұғым

Осыдан 25-30 жыл бұрын әлем елдері жер бетінде Қазақ деген ел барын біле бермейтін еді. Ол біз айтпасақ та белгілі еді. Енді, міне, уақыт алға жылжыған сайын дәуірлеу дейтін алып кезеңнің ілегіне ілестік. Өшкенмізді қайта жағып, өлгенімізді тірілттік. Ширек ғасыр белесінен сырғып өтіп, ордалы 30 жылдың ішінде әлем танитындай дәрежеге жеттік. Мұның баршасы еліміздің бағына біткен Тәуелсіздіктің арқасы. Ал сол тәуелсіздікті мызғымастай етіп, берік етуге өзінің өлшеусіз үлесін қосқан жанның бірі –Елбасымыз Н.Ә.Назарбаев дер едім. Бүгінде сол Тәуелсіздік пен Елбасының есімі қатар аталады. Онсыз бүгінгі бейбіт күнді елестету де мүмкін еместей сезіледі. Өйткені сонау тоқырау кезеңінде балапан басына, тұрымтай тұсына кетіп, елдегі өндіріс ошақтарының оты сөнді. Бір сөзбен айтқанда, жай ғана иесіз қалған ұлан-ғайыр атырапты қазақтың өз меншігіне қайтарып, одан Тәуелсіз Қазақстан деген ел жасау ісі Елбасы бастаған аға буынның алдында тұрған басты мақсат еді. Тіпті бұл бабалар аманаты десек те болады. Бүгінде сол мақсат орындалды. Тәубе, Қазақстан бүгінде экономикасы қуатты, келешегі кемел елдердің қатарында. Өзіне тән ұлттық болмысы мен салт- дәстүрі, тілі мен ділі бар еліміздің ертеңіне сенемін.

Қазір білекке емес, білімге сенетін заман. Осы заманның талабынан шыға біліп, өзінің ақыл-парасаттылығының арқасында талай жандарға үлгі болған Тұңғыш Президентімізді бүгінде білмейтін жандар кемде-кем. Тіпті, алпауыт мемлекеттердің басшылары да біздің Елбасымызбен ақылдаспай, әлемдік деңгейдегі мәселелерді талқыламайтын дәрежеге жетті. Мұның артында Қазақ елінің мерейі тұр дер едім. Біз осындай басшымыздың болғанына мақтанамыз. Күні бүгінге дейін Елбасы жүргізген сарабдал саясаттың нәтижесінде әр саланың тамырына қан жүгірді. Ішкі істер саласы да қоғам алдында өзінің жүйелі жұмыстарымен ерекшеленіп, қуатты органға айнала білді. Бүгінде қоғамның тыныштығы мен халықтың құқықтық тең дәрежеде өмір сүруіне жан-жақты жағдай жасалып келеді.

Иә, еліміздің дамуына өзінің ерік-жігерін аямай, әрбір қазақты жалғызым деп білген Ұлт Көшбасшысына біз қашанда дән ризамыз. Оның осы еңбегінің өтеуі және елдің алғысының белгісі ретінде еліміз 1 желтоқсанды Қазақстан Республикасының Тұңғыш Президенті күні қылып белгіледі. Бұл мерекені тойлауда біздің балаларымыз Тәуелсіз Қазақстан Республикасының алғашқы басшысы кім және оның қандай жан болғанын мәңгілік естерінен шығармайды деп білеміз.

А.Байоразова,

аудандық полиция бөлімі бастығының кадр жөніндегі орынбасары