Мереке қарсаңында жаңа автокөліктер табысталды

Бүгін Қазақстан Республикасы Тәуелсіздігінің 30 жылдығына орай учаскелік полиция инспекторларына және ветеринарлық станция қызметкерлеріне жол талғамайтын жаңа автокөліктер берілді. Жаңа автокөлік кілттерін аталған сала қызметкерлеріне аудан әкімі Серік Сермағамбетов табыстады.

Аудан басшысы полиция департаментінің материалдық-техникалық базасын жақсарту полицейлердің жұмысын тиімдірек етуге көмектесетінін атап өтті. Сонымен қатар ветеринария мамандарына берілген көлік сала мамандарының жұмысын оңтайландырып, діттеген жерге дереу жетуге мүмкіндік туғызатындығын және ауылдық жерлердегі мал шаруашылығына оң септігін тигізетіндігін айтты.

Айта кетейік, полиция инспекторларына берілген «JAC» маркалы автокөліктер Қаратерең, Аққұм және Ақбасты, Құланды ауылдық округтеріне, ал ветеринариялық станция мамандарына берілген «УАЗ» маркалы көліктер Атанши, Ақбасты, Сапақ ауылдық округтеріне жіберілді.