Жаңа оқу жылына жаңа мектеп ашылады
Ауданда құрылыс жұмыстары қарқынды жүргізілуде. Құрылысы аяқталып, халық игілігіне беріп жатқандары да бар. Бүгінде қаланың көркіне айналған алып құрылыстардың бірі – қаланың кіреберіс жағында салынып жатқан №71 мектеп- интернатының ғимараты. Естеріңізде болса, бұған дейінгі аталған мектептің ғимараты апатты жағдайда деп танылған еді. Ескі ғимараттың жарық қабырғалары мен еңкіш тартқан еңсесі келушілерді үрейлендіргенімен, онда балалық шағы өтіп, асыр сап ойнаған талай буын ұстаздардан білім алды. Содан да болар, көне мектепке қимастықпен қарайтындар баршылық. Әйтсе де баланың еркін білім алуына айтарлықтай кедергісін келтіретін мектептің қазіргі жағдайы көпті алаңдатып отырғаны жасырын емес. Енді, міне, мұнда білім алатын балалар үшін жаңадан 200 орындық мектеппен қоса 100 орындық интернат салынып жатыр. Енді осы жаңа ғимарат жөнінде аз-кем ақпар.2021 жылдың сәуір айында басталған құрылыс жұмыстарының бүгінде 90 пайызға жуығы аяқталған. Мердігер мекеме өкілдерінің айтуынша, осы жылдың қыркүйек айында толық пайдалануға берілмек. Жалпы құны 1 млрд 330 миллион теңгеден асатын қаржыны құрайтын бұл мектепке алғашында 981 млн теңгеден астам қаржысы қаралған. Ал бүгінде қалған қаржы толығымен қаралып, жоба сәтті жүзеге асып жатыр.
Атшаптырым аумақты алып жатқан алып құрылыс нысанына жолымыз түсті. Мұндағы құрылыс сапасының қаншалықты деңгейде жүргізілгеніне мамандардың айтар өз жауабы бар. Әрине сапалы болған істе шу да, басқа да болмайды. Десе де мектеп-интернаттың сыртқа нобайы мен жалпы құрылыс жоспары сәтті шыққан тәрізді. Ішкі сызбалары мен қосымша қауіпсіздік аймақтары да жақсы жоспарланған. Алыстан менмұндалайтын алып нысанның көз тойдырар көрікті келбеті бізді бір көргеннен-ақ тәнті етті. Алып құрылыс алаңында тынымсыз еңбек етіп жатқан жұмысшылар жеткілікті. Ал бұл құрылысты қолға алған бас мердігер «SCSИнжиниринг» ЖШС қазірдің өзінде қос ғимараттың күрделі құрылыс жұмыстарын бітіріп, ішкі әрлеу жұмыстарын да сәтті аяқтаған. Бұл маңда жалпы саны 60-қа тарта жұмысшы еңбек етуде. Оның басым бөлігі жергілікті жерден жұмысқа тартылған азаматтар. Әрине мекеме өзге өңірден болған соң құрылыста келісім бойынша жобалық жұмыстар жүзеге асырылып тұрады. Әр қызметкер өз жұмысына тиянақты кіріскендіктен жоспарлы жұмыстың нәтиже берері сөзсіз. Біз танысқан құрылыста жүйелі жұмыс бар екені анық байқалды.
Өзін осы мекеменің жабдықтаушысымын деп таныстырған Қамшыбай Отарәлиев қазіргі уақытта мектеп ауласында абаттандыру, әрлеу жұмыстары жүргізіліп жатқандығын жеткізді.
– Қазіргі таңда бұл маңнан әрлеуші мен сырлаушы, дәнекерлеуші мен электрик немесе сантехник сынды мамандарды кездестіруге болады. Барлығы да осы құрылыс жұмыстарының сәтті аяқталуына мүдделі. Негізі мердігер мекемеге қарасты жұмысшылар саны 15-ке жуықтаса, оның 4-еуі механизатор, 11-і қатардағы жұмысшы. Мекеме жылу беру маусымына толықтай дайын. Жылу қазандығы көгілдір отынмен жабдықталған. Қосымша дизельді отынмен де жылыту қарастырылған. Қазіргі таңда мекеменің аумағына 370 түп тал отырғызылды. Оны да уақытылы суарып, күтіп-баптау жұмыстарын атқарып келеміз. Құрылыс толық аяқталған соң, қосымша абаттандыру мақсатында әртүрлі гүлдер егу жоспарланған. Қысқасы, бұл маң сәні келіскен көрікті нысанға айналғалы отыр. Қазіргі таңда ішкі әрлеу жұмыстары да аяқталды. Тоқ жөні толық жүргізілді. Сантехникалық жұмыстары да жобаласты. Енді құрылғыларды орнату керек. Барып көрем десеңіз мархабат, – деген жабдықтаушы Қ.Отарәлиев бізді мектеп ғимаратына бастады. Мектептің ішкі қабырғалары біртегіс әрленген. Спорт залы мен оқушылар бөлмесі, асхана мен компьютерлік орталығы да жарық әрі кең. Екі қабатты нысанның әрбір жұмысы толық жоспарға сай жүзеге асырылып жатыр. Ендігі кезекте – мектептің айналасын ретке келтіріп, арнайы жолақтар мен сыртқы спорт алаңы.
Иә, сәт сайын жүк артып мектепке аялдаған жүк көліктерінен көптеген зат түсірілуде. Сол көріністерге қарағанда мұндағы жұмыс әзір аяқталмайтындай көрінеді. Алайда «көз – қорқақ, қол – батыр» деген. Енді бір 2-3 айда бұл маңда құрылыс жұмыстары толықтай аяқталмақ. Біз соған сендік. Бастысы, балаға жасалған жайлы орта оның ертеңі үшін маңызды. Сол үшін мемлекет қолға алған жұмыстың сәтті әрі сапалы болуын тілейміз.
А. БИСЕНОВ
