Аралдық құтқарушылар көмекте...
Қарғын судың әлегі әлі басылар емес. Тіпті еліміздің кейбір аймақтарында жағдай күрделеніп бара жатыр. Мәселен еліміздің батыс аймағында жағдай күрделеніп барады. Алпыс мыңнан астам халқы бар Құлсары қаласының өзінде 2000 нан астам үй мен мемлекеттік нысандар су астында қалды. Ендігі екпінді күш Қостанай мен Оралға түсіп жатыр. Ол жақта да ағын судың екпіні әл бермей барады. Дейтұрғанмен осындай сын сағатта біріге қалатын қазақ жұртының ауызбірлігінің арқасында кейбір елді мекендер үшін қауіптің беті сейіле бастады. Қазіргі таңда еліміздің басқа аймақтарынан тиісті өңірлерге күштік құрылым мен техникалар күші толық жұмылдырылып, сын сағатта сыналып жатқан жайымыз бар. Сонымен қатар гуманитарлық көмектер де жолданып, әркім өз әлінше қиын жағдайда қалған аймақтарға көмек қолын созып жатыр. Біз бұған дейін осы Аралдан да бірнеше көлікпен Ақтөбе, Атырау аймақтарына гуманитарлық көмектер жіберілгенін жазған едік. Сонымен қатар аудандағы №3 мамандандырылған өрт сөндіру бөлімінің атынан Ақтөбе облысына осы жылдың 29 наурызында 21 құтқарушы көмекке барып олардың Отандастары үшін жасап жатқан ерлік істері жайлы айтуды жөн көрдік. Бүгінде Қостанайда жүрген 21 құтқарушы жігіттерден бөлек тағы бір лек Орал қаласына қарай аттанды.– Біздің жігіттер қашанда көмекке әзір тұратынын мақтанышпен айта аламын. Қазіргі таңда су басқан аймақтардағы ахуалды тұрақтандыруға күш біріктіріп жатқан барша қазақстандықтардың қатарында Аралдан барған құтқарушылар жасағы да бар. Олардың алғашқы легі қазір Қостанай өңірінде. Ал осыданда бірер күн бұрын 21 құтқарушы жігіттен құралған тағы бір жасағымыз батыстағы Орал өңіріне қарай аттанды. Сонымен бірге 1 техникамыз көмекке жіберілді. Алла біздің жігіттерімізге жар болсын, – дейді №3 мамандандырылған өрт сөндіру бөлімі бастығының орынбасары, азаматтық қорғау капитаны Н.Тоғысов.
Иә қиын-қыстау заманның қазіргі ауыртпашылығы әрбір қазақ үшін оңай болып тұрған жоқ. Қаншама жылдық маңдай тер мен жиған-тергеннің бәрі су болып ағып кеткені қандай өкінішті?! Бірақ қазақ үшін жаннан басқаның бәрі садақа емес пе еді. Қазіргі уақытта қауіп төнген аймақтардағы тұрғындарды эвакуациялау жұмыстары әлі де жалғасып жатыр. Міне, сол жұмыстарда аралдық жігіттердің де айрықша үлесі бар. Наурыз айының соңында көмекке аттанған алғашқы лектегі жігіттер осы сәуір айның 9 жұлдызында солтүстіктегі Қостанай облысына қарай аттанған. Бүгінде өз жұмыстарына адал аралдық азаматтар өздеріне жүктелген міндетті жұмыстарды абыроймен атқарып жатыр.
А.ҚАРАСАЙ
