Сеңнен төнер қауіп бар ма?
Күн жылып, көктем де келді. Жердің бауыры бусанып, күн қабағы жайлылықты танытатын осы мезгіл келгеннен аймақ жұртшылығының көңілі алаңдайды. Алаңдауға себеп жоқ емес. Қысқы қар суларының еруі әсерінен облыстың барлық ауданын бойлай ағатын Сырдарияның деңгейі көтеріліп, су бетіне қатқан мұздың еруі кезінде сең көшеді. Осының салдарынан арнасынан асқан дария суы жағалай қоныстарған ауылдар мен елді мекендердің қауіпін тудырады. Иә, табиғаттың заңдылығына қарсы шыға алмаймыз. Десек те, қауіп пен орын алар шығынды болдырмау мақсатында қандай да болмасын тосын жағдайға дайын болып, төтеп беру басты мақсатымыз.Жыл сайын қайталанатын қатердің бетін қайтару, сең көшкініне қарсы дайындықты пысықтау, әркез назарда ұстау жұмыстары Сыр елі үшін көктемдегі атқарылатын істің үлкені. Сол мақсатта облыс әкімі Арал ауданы сең көшу уақытындағы басты назарда болуға тиісті аумақ деп, бақылауды күшейтуді тапсырған болатын. Осыған орай ауданәкімі М.Оразбаев Сырдария өзені бойындағы елді мекендерді аралап, сеңнен төнер қатердің қаншалықты қауіпті екендігін өз көзімен көріп қайтты.
Сапар Райым ауылдық округінің орталығы Қызылжар елді мекенінен басталды. Ауыл тұрғындарының қаншама жылдан бергі сұрауының нәтижесінде жыл бұрын ғана пайдалануға берілген қалқымалы көпірде болып, дарияның қолайсыздық тудыратын тосын сыйының жағдайына қанықты. Су деңгейі қалыпты жағдайда. Ал, қыс мезгілінде Сырдарияның бетін басқан мұз айдынының да көбесі сөгіліп, елді мекен мен аудан орталығын жалғап тұрған қалқымалы көпірге де, Қызылжар тұрғындарына да төндірер қауіптің жоғына көз жеткізді. Ағысынан жаңылмайтын арқыраған өзен суының арнасынан асар қауіпі байқалмайды.
Одан әрі аудан әкімі қашан да көктем мезгілінде ең қауіпті мекендердің қатарынан түспейтін сыр бойындағы үлкен ауылдардың бірі Аманөткел елді мекенінде өз сапарын жалғастырды. Дарияның ең күшті ағысы орын алатын ауылдың іргесінен ағып жатқан арнасы тыңғылықты әзірлік пен төтенше жағдайдың алдын алу ісін бір сәт бақылаусыз қалдыруға болмайтын тұсы да осы жер. Күн қабағы ашылғаннан дария суының деңгейін қалыпты ұстау жұмыстары жүргізілетін осынау ауылда жұмыстар жемісін беріп отыр деп анық айтуға болады. Себебі, аманөткелдіктерге де сеңнен келер қауіптің жөні байқалмайды. Қазірдің өзінде қыстай өзен бетін құрсап жатқан мұздың бүгінде көбесі сөгіліп, дарияны ағысынан адастырар қауіпі жоқ. Топырағы онсыз да сазды елді мекеннің Сырдың ағып жатқан тұсы сазға айналғанымен өзеннің ернегінен төмен. Дегенмен, «жаудан қашып құтылсаң да, судан қашып құтылмайсың» деген емес пе? Осыны басты назарда ұстаған аудан басшысы екі ауылдық округтің де әкіміне сеңнің беті қайтты деп салғырттық танытпауды баса тапсырды.
Су – тілсіз жау. Әрбіріміз дария деңгейінің арнасынан асу қаупінен сақтануды естен шығармағанымыз абзал.
Оңталап ЖОЛДАСОВ.
