Аманөткелде жаңа сауда үйі ашылды

Қазіргі таңда мемлекет тарапынан кәсіпкерлік саласына ерекше ден қойылып, бизнесті дамытуға қолайлы жағдай жасалып келеді. Шағын және орта бизнестің тамырына қан жүгіргелі аудан орталығымен қатар, кент, елді мекендерде де кәсіппен айналысуға ниетті азаматтар саны артып, кәсіпкерлік нысандары да көбеюде. Ауданға қарасты елді мекендерде ашылып жатқан сондай орталықтардың қатары бүгінде толыға түсуде.

Аманөткел ауылындағы жеке кәсіпкер Ержан Смағұлов пен Айдана Алдамжарованың «Ақжүрек» сауда үйі Тәуелсіздік мерекесі қарсаңында ауыл тұрғындарына есігін айқара ашты. Тұрмысқа қажетті түрлі өнімдер қамтылған сауда үйінің жанында шаштараз және сұлулық салондары жұмыс істейді.

Жаңадан бой көтерген сауда үйінің ашылу салтанатында ауыл әкімі Қ.Әбдіраманов сөз алып, кәсіп бастаушы азаматтардың ісіне сәттілік тілеп, ауыл тұрғындарын мерекемен құттықтады.

Жеке кәсіпкер Е.Смағұлов халыққа қызмет істейтін кәсіпкерлік нысанға ауылдың 4 тұрғыны жұмыспен қамтылғанын айтып, сауда үйі халық үшін үздіксіз жұмыс істейтінін жеткізді.