Толқын Tolqyn.kz ақпараттық агенттігі
» » Колледж ұжымы Жолдауды қолдайды

Колледж ұжымы Жолдауды қолдайды

Бүгінде Елбасы Жолдауы жүктеген міндеттер қай салада болмасын, жүйелі талқыланып, ондағы қолға алынар істер жан-жақты қолдау табуда. «Төртінші өнеркәсіптік революция жағдайындағы дамудың жаңа мүмкіндіктері» атты Елбасы Жолдауы бұл жолы өнеркәсіп саласының дамуына тың серпін бере түскендей. Біз сол саланы дамыту арқылы ел алдындағы жаңа міндет әлемнің дамыған 30 елінің қатарына енуге тағы бір қадам жақындай түсеріміз анық. Міне, сондықтан Елбасы Жолдауы тек қана танысып шығуды емес, онда жүктелген маңызды міндеттерді алдағы уақытта нақты жүзеге асыруды көздейді. Осы тұрғыда қаладағы Арал индустриалды-техникалық колледжі ұжымы да жиын өткізіп, Елбасы Жолдауын талқылады. Күн тәртібіндегі мәселеге байланысты колледж директорының оқу-тәрбие ісі жөніндегі орынбасары Б.Жиеналиев хабарлама жасап, бұл Жолдаудың негізгі мазмұны қазіргі жаһандық жағдайда әлем елдерінің көшінен қалмай, ең дамыған 30 елдің қатарына қосылу үшін ғылыми-техникалық, ақпараттық-технологиялық салалары дамыту және адами капитал-жаңғыру негізі екендігіне тоқталды. Сондай-ақ, Елбасы көрсеткен 10 басым бағыттың маңызын түсіндірді.
Жолдау жолдарында көрсетілген өзекті мәселелердің барлығы жаңа заманға лайықты даму бағытында оң өзгерістер мен дамуға бастайтын маңызды бағыттар екендігі колледж әдіскері Н.Жұмаева тарапынан да айтылды. Ол – Жолдаудың жетінші тарауындағы білім саласына берілген басымдылық, яғни, педагогтарды оқыту және олардың біліктілігін арттыру жолдарын қайта қарастыру, латын әліпбиіне көшу, цифрлық білім беру ресурстарын дамыту, техникалық және кәсіптік білім беру бағдарламаларын жаңарту істерінің алдағы уақытта ұжымға жаңа міндеттер жүктеп, білім саласына тың серпін әкелетіндігін әңгімеледі.
-Қазір техникалық мамандықтардың, ғылым мен инновацияның күні туған заман. Ерінбей еңбек еткен, талмай ғылым іздеген, жалықпай техника меңгерген адамның озатынын Елбасымыз жыл сайын айтып келеді. Биылғы жылы да баршаға арналған тегін кәсіптік білім беруі, цифрлық ресурстарды дамыту-мұның бәрі де Елбасымыздың көрегендігі және кәсіптік білім беру саласын өркендетуге жасаған іргелі жобаларының бірі-деген колледж студенттер ұйымының төрайымы Г.Адаева аталған Жолдауға өзінің оң көзқарасын білдірді.
Жиналысқа қатысқан өзге де ұжым мүшелері Елбасы Жолдауымен толықтай таныс екендіктерін және онда көрсетілген міндеттерді орындау үшін бірлік пен ынтымақ керек екендігін ортаға салды. Сонымен қатар, Елбасы сөзін қуаттайтындықтарын, қолдайтындықтарын жеткізді.    
Г.Мейірманова,
Арал индустриалды-техникалық колледжі.
13 наурыз 2018 ж. 1 196 0