Өріске малын өргізген...
Қазір мемлекет берген мүмкіндікті пайдаланбай, ой үстінде жүріп, нақты шешімге келе алмай жүрген азаматтар көп. Дені кәсіп бастағысы келеді, бірақ қаржылық іске келгенде қомақты несие алып, тәуекелге барғысы келмейді. Бүгінде мемлекеттен көрсетіліп жатқан көмектің арқасында өрісін малға толтырып жатқан шаруалар көпке үлгі болып-ақ келеді. Жастайынан әке тәлімінен қуат алып, шаруаға бейім өскен Ералхан да мемлекеттен несие алып, өз кәсібін бастаған азаматтар қатарынан. Уақ мал мен Ойсылқара тұқымын бағып отырған азамат Ералхан Мүбараков Сазды ауылында тұрады. Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасы» аясында өткен жылы «Бастау-Бизнес» қысқа мерзімді оқу курсын оқып, мал шаруашылығын дамытуды көздеген ол өткен жылы қайтарымсыз несиеге қол жеткізіп, оған 17 қой сатып алса, «Арал ырысы» ЖШС арқылы 6,9 млн теңге төмен пайызбен несие рәсімдеп, түйе малының басын көбейтуде. Ауыл сыртындағы «Түкпірши» деген өңірде мал бағып отырған жас кәсіпкердің қолға алған ісі ауқымды. Ойға алған мақсаттары да маңызды.
– Өзім осы Саздының тумасымын. Мен де елдің балалары секілді ауыл мектебін бітірген соң, арман қуып Ақтөбеге оқуға аттандым. Тәмамдаған мамандығым темір жол саласы бойынша. Елге оралған соң мамандығым бойынша жұмыс табу қиын болды. Уақыт өте өзім ортасында өскен осы мал шаруашылығына неге ден қоймасқа деген ой болды. Себебі әкем де осы төрт түлік ұстаған жан. Алғашында мұндай мүмкіндіктің барын білгенмен, өзімді іштей дайындадым. Тәуекелге бел байлап «Бастау-Бизнес» жобасы бойынша оқу оқып, өз кәсіптік жоспарымды құрдым. Ұтымды әрі уақытылы дайындалған жобам қолдау тауып, мемлекеттік грантқа ие болдым. Оған 17 бастай қой алып, осылайша өз ісімді бастадым, – дейді жас шаруа Ералхан.Өзге қатарластары секілді өз күшімен көтерілуді көздейтін Ералхан бүгінде малды ауыл мен Саздының екі ортасын жол қылып жүр. Өз қарамағындағы малдарды ұдайы бақылауда ұстаған ол шаруаның адамына айналған. Алдағы уақытта несиеге алған 10 бас түйенің санын көбейте түсуді көздейді.
– Биылғы қыс аудандағы шаруаларға айтарлықтай күш салмады деген ойдамын. Себебі осы өңірде отырған өзімізге де қыс жайлы болды. Малдың басын аман алып шықтық. Енді төлін күтіп отырмыз. «Арал ырысы» ЖШС арқылы несиеге алған аналық түйелердің алды төлдеп жатыр. Қазір үш түйе боталап тұр. Қалғандары да амандық болса, бірер айдың көлемінде төлдеп болады. Ал уақ малдар енді төлдейді. Осы малдардан төлді толықтай алып болсам, олар отыққан соң несие төлеуді бастаймын. Жалпы, несие алған кәсіпкерлерге осындай мүмкіндіктер ұсынып отырған мемлекеттік бағдарламаның тиімді тұстары өте көп дер едім. Сондықтан ой үстінде азаматтарға тәуекел ету керек. Сонда барып іс алға басады, – дейді жеке кәсіпкер Е.Мүбараков.
Иә, елдің ішінде жүріп-ақ өз қатарластарына үлгі болып жүрген жастар болашақтың негізін қазірден қалағаны жөн. «Жасымда бейнет бер, қартайғанда зейнет бер» деген халқымыз қай істе болмасын жастан үлкен үміт күткен. Сол үмітті ақтай білетін Ералхан секілді азаматтар көп болса, еліміз өркендей түспек.
А.ҚАРАСАЙ
