Еңбегі елеулі журналист

Теңізді өлке төңірегінен шығып, туған еліне еңбегі сіңген азаматтарымыз жетерлік. Соның бірі – Кеңес Өмірзақов ағамыз болады. Бүгінгі тақырыбымызға арқау болып отырған Кеңес ағамыз 1936 жылы Аманөткел елді мекенінде дүниеге келген. Осы ауылдағы сегізжылдық мектепті бітіріп, Бөген ауылындағы №20 мектепте оқып, орта білім алып шығады. 1954 жылы Ташкент қаласындағы гидромелиоративтік институтына оқуға түседі. Екі курс оқыған соң денсаулығына байланысты туған жерге оралып, «Аралтұз» мекемесіне инженер-сызбашы болып қызмет ете бастайды. Осы жылдары қолына қалам алып өндірісті өңірдің тыныс-тіршілігі мен еңбек майталмандары туралы мақалаларын аудандық, облыстық газет беттеріне жариялап бастайды. Арал ауданында Қазанғап атындағы ұлт-аспаптар оркестрі құрылғанда оның алғашқы мүшелерінің бірі болады.1964 жылы «Толқын» қайта ашылып, қалың оқырманымен қайта табыса бастағанда атаулы басылымда журналистік қызмет бастап, еңбек етеді. Әдеби қызметкер болып бірнеше жыл істеген соң, газеттің ауылшаруашылық бөлімінің меңгерушілік қызметіне жоғарлатылып ұзақ жылдар қарым-қабілетін танытып, еңбегі сіңеді.
Жергілікті баспасөзде қоғам мен өміріміздегі әртүрлі көкейтесті мәселелерді қозғап, көркем очерктері, сынға толы фельетондары, мәнді мақалалары газет оқырмандарының көңілінен шығып отырады. Кеңес Өмірзақұлы сонымен бірге бірнеше повестің, көркем әңгімелердің авторы.
Ол еңбек зейнетіне шыққан соң да журналистік қызметтен қол үзбей «Арал ақиқаты», «Тұран Қазалы» газеттерінде қызметін жалғастырады. Сондай-ақ ол КСРО және Қазақстан Журналистер одағының  мүшесі атанады. Өмірлік жары Назира апа екеуі 10 бала тәрбиелеп өсірді. Кеңес ағамыз 2019 жылы өмірден өтті.

Өз тілшімізден