Медиацияның тиімділігіне ден қойды

Бүгінде тараптардың ымыраға келуі арқылы азаматтық істердің медиация тәртібімен тоқтатылу рәсімдері жиі кездеседі. Мұндай әрекеттер процеске қатысушылардың қатынастарын теңгеріп қана қоймай, соттарда қаралатын істердің санын да азайтады. Негізінен, сот істерінде тараптардың ымыраға келуі, істі аяқтаудың ең тиімді жолы болып табылады, өйткені істе жеңіліс тапқан тарап болмайды, екі тарапта қол жеткізген нәтижеге разы болады.Айталық, Арал аудандық сотында талап қоюшы Е-ның жауапкер М-дан 104 000 теңге қарызын өндіру туралы азаматтық ісі қаралды.
Істі сот талқылауына дайындау барысында, сотпен тараптарға дауды татуластыру рәсімдері арқылы шешу құқықтары түсіндірілген.
Осыдан кейін тараптар кәсіпқой медиатордың көмегіне жүгініп, дауды медиация тәртібімен реттеу туралы келісімге келіп, оны бекіту үшін сотқа ұсынған.
Медиациялық келісімге сәйкес, жауапкер берешек  қарызын осы жылдың аяғына дейін төлеп құтылуға міндеттенген, ал талап қоюшы келісім талаптарын қабылдап, іс жүргізуді тоқтатуға келісімін берген.
Осыған орай, сотпен дауды медиация тәртібімен реттеу туралы жасалған келісімнің шарттарын бекіту және іс жүргізуді тоқтату туралы ұйғарым қабылданды.
Арал аудандық сотының
баспасөз қызметі