Жаңақұрылысқа да ұялы байланыс орнатылды

Жаңақұрылыс  – болашағы жарқын ауылдардың бірі. Түтіні түзу ұшқан елді мекеннің тұрғындары тәуелсіздік күні қарсаңында тағы да бір қуанышқа бөленді.Қазақ қашанда азаматтарын құрметтеген ел. Халық пен биліктің арасын тең ұстау үлкен мәдениеттілік пен іскерлікті талап етеді. Талапшылдық,  іскерлігімен аудан экономикасы мен халықтың әлеуметтік-тұрмыстық жағдайын жылма-жыл дамытып, көтеріп жүрген аудан әкімі Мұхтар Оразбаев туралы тілге тиек етпекпін. «Әкім бол, халқыңа жақын бол» дегендей, ел басқарып, аудан халқының көңілінен шығу екінің бірінің қолынан келе бермейді. Мұхтар Әуесұлы ауданды басқару тізгінін қолға алғаннан бері аудан көлемінде көптеген игі істер атқарылды.Сондай істердің бірі ауданнан шалғай орналасқан Жаңақұрылыс елді мекенінде жалғасып келеді. Ауыл тұрғындарының жыл басында аудан әкімінің есепті кездесуі жиынында аудан әкіміне бірнеше ұсыныс-пікірін айтқан. Бірінші – ұялы байланыс, интернет жүйесін іске қосу. Екінші – мектеп оқушыларының аудан орталығындағы болатын олимпиада жарыстарына қатысуға мектепте арнайы автокөлік жоқтығы. Үшінші – Жаңақұрылыс-Бекарыстан би аралығындағы 22 шақырым автожолдың жөнделуі. Төртінші  – «Нұралы» жармасына шлюз салу. Бесінші – Хан қалқымалы көпірін жөндеу жұмыстары.

Осы аталған жұмыстар бүгінгі таңда халыққа өз нәтижесін беруде. Яғни мектеп оқушыларының тілегі қабыл болып, мектепке автокөлік беріліп, ата-аналар мен оқушылар қуануда. Жаңақұрылыс-Бекарыстан би ауылы аралығындағы жол жөндеу жұмыстары басталып,  келер жылы халық игілігіне беріледі деп күтілуде. «Нұралы» жармасына шлюз салу жобасы жасалды. Тәуелсіздік күніне орай ауыл орталығынан ұялы байланыс телефоны орналасып, халық игілігіне берілді. Ауыл тұрғындары қашықтағы ағайындарымен, балаларымен үйде отырып-ақ сөйлесе беретін болды. Бұрынғыдай төбе-төбені қуаламайды. Әрине мұны аудан әкімі Мұхтар Оразбаевтың жаңақұрылыстықтарға деген тартуы деп білеміз.

Мемлекет басшысы Қасым-Жомарт Тоқаевтың Қазақстан халқына арнаған Жолдауында «Цифрландыру сәнге айналған үрдіске ілесу емес, ұлттың бәсекеге қабілеттілігін арттырудың негізгі құралы» деп атап айтқан. Мемлекет басшысы Жолдауының іске асырылып жатқаны қуантады. Аудан басшысы жылдық есеп беру кезінде жаңақұрылыстықтардың талап-тілектері толығынан ескеріліп, орындалғанына ауыл тұрғындары аудан әкімі Мұхтар Әуесұлына ризашылықтарын білдіріп, ақ батасын беруде. «Әкім бол, халқыңа жақын бол» деген осы болар.

Серделы Шалбаев,

Жаңақұрылыс ауылдық ардагерлер

кеңесінің төрағасы