Ілкімді істер атқарылды

Жақында аудан әкімі Мұхтар Оразбаевтың өткен жылы атқарылған жұмыстар мен алдағы жылдың міндеттері туралы аудан халқының алдында есепті жиыны ZOOM платформасы және Youtube арнасында тікелей эфир арқылы өтті. Бұл онлайн кездесуде Аманөткел ауылы тұрғындары өздерін толғандырған мәселе мен елдегі шешімін таппаған сауалдарын аудан басшысына жеткізуге мүмкіндік алды. Кездесуде жыл бойы атқарылған ауқымды істерге қанығып, алдағы міндеттерден хабардар болдық.

Назар аударып отырсақ, ауқымды шаруалар атқарылып, тындырымды тірліктер істелген. Әсіресе ауылда тұратын халыққа оңтайлы жағдайлар жасалуда. Жолдар жөнделіп, ауызсу тартылып, ұялы байланысқа қол жеткізілуде. Ата кәсібіміз балық және мал шаруашылығы да қайта түлеп, балық өнімі экспортқа шығарылып, мал саны жыл өткен сайын артып келеді. Сондай-ақ кәсіп ашып, шаруасын дөңгелетіп отырғандар да жетерлік. Мұның бәрі ел игілігі үшін жасалып жатқан игі істер. Аудан дамуы қарқынды жүргізіліп жатқаны көңіл қуантады.

Сонымен бірге ауыл тұрғындарының алдағы уақытта аяқ су мен жайылымдық жер мәселесі шешімін тапса, көне мектептің орнынан жабық спорт кешені мен типтік жобадағы мәдениет үйі және көршілес Хан елді мекенінен амбулатория салынса деген ұсыныстары да ескеріледі деген үміттеміз.
М. ЕЛЕУОВА,
Аманөткел ауылының тұрғыны