Елбасының «Тәуелсіздік тағылымы» атты мақаласы жарық көрді

Елбасы мақаласын оқыған болсаңыз, тәуелсіздік жолында дана қазақтың құрбандығы мен қиыншылығының ұшан – теңіздігіне көзіңіз тағы бір мәрте жетеді. Отыз жыл бұрын тәуелсіздігімізді алдық. Біздің таңдауымыз азаматтық пен бостандық болды.Нұрсұлтан Назарбаев егемендік алғаннан-ақ Қазақстанға экономикалық жаңғыру, инфрақұрылымды жаңарту және шикізатқа тәуелділіктен құтылу қажет екенін түсінгенін жазған.
«Президент ауысады, бірақ Тәуелсіздік мәңгілік болуы керек. Әр қазақстандық алдағы уақытта оның тұғырын нықтап, еңсесін тіктеп, абыройын асыруға қызмет етуге тиіс. «Мәңгілік ел» идеясының түпкі мақсаты осында. Ең бастысы – еліміз аман, ұрпағымыз азат. Біз алақанға салып өсірген сол азат ұрпақ ендігі жерде «Мен Қазақстаныма не беремін?» дегенді ойлауы керек. Біз өзіміздің толағай табыстарымыз арқылы тәуелсіздікке сенбегендерді иландырдық, көнбегендерді қатарымызға тарттық, әлем мойындаған абыройлы мемлекетке айналдық. Тәуелсіздік те бақыт сияқты, бағалаған адамның, аялаған қоғамның қолына тұрақтайды. Халқы тату, экономикасы қуатты, саяси жүйесі тұрақты, мәртебесі биік, абыройы асқақ Қазақстанның болашағы кешегіден кемел, бүгінгіден нұрлы екендігіне кәміл сенемін.Тәуелсіздікке берік іргетас болып қаланған бабаларымыздың асыл мұраты – ерлік пен елдігімізден күш-қуат алып, әрдайым алға баса берейік, ағайын!», - деп түйіндейді мақаласында ҚР Тұңғыш Президенті.
Д.Мәдинов,
Арал аудандық мәслихат депутаты