Ұлы жол бойындағы ұлағатты іс

«Бағалай білмегенге бақ қонбайды, қуана білмегенге құт қонбайды» дейтін халқымыз үшін әр мерекенің маңызы зор. Әсіресе ұлттық сипат алған әз-Наурыз мерекесі халқымыздың қуана тойлап, шадыман-шаттыққа кенелер шағы. Бұл күні жер-жерде наурыз көже асылып, ел-жұрт тоқшылық пен молшылықта болады. Онысы ескі жыл қайыруында күн мен түн теңелер шақтан бастап жыл он екі ай молшылық болсын, ел-жұрт ешқашан жұтамасын дегендегісі. Бүгінде сол үрдіс әлі жойылған жоқ. Керісінше жылдан жылға мәні мен маңызы артып келеді. Осы бір мерейлі сәтте Сапақ елді мекенінің халқы да қуаныш құшағында болып, жергілікті кәсіпкер Гүлзия Елешованың көпшілікке арнайы дайындаған ұлттық асынан дәм татты.

«Батыс-Еуропа – Батыс-Қытай» таранзиттік көлік дәлізінің бойында жолаушыларға қызмет ететін кәсіпкердің сервистік нысаны осы Сапақ маңында орналасқан. Бұл ауылда ұлттық мереке өз деңгейінде тойланды. Шаттанған бала, қуанған қарт. Бәрі де мерекелік мезетте бас қосып, ауыл халқының үйлесімді тірлігіне үн қосуда. Ұлыстың ұлы күнінде жиналған жұртшылық алдында ауыл әкімі Ж.Жалғасбаев сөз сөйлеп, барша ауылдастарды мерекелерімен құттықтады. Ұлыстың ұлы күні қарсаңында көпшілікке көже дайындап, өзінің жомарттығын танытқан кәсіпкерге де ауыл халқының атынан алғысын білдіріп, кәсібіне береке тіледі.

Иә, қашанда елдің қамын ойлайын іскер азаматтар барда жұрт жұтамайды. Оған дәлел мереке қарсаңында ұйымдастырылған осындай бастамалар. Мұндай жұмыстар кәсіпкерлердің де әркез елмен бірге екенін көрсетеді.

А. ҚАРАСАЙ