Сапақтағы серпінді істер
Сапақ. Енді «Батыс Еуропа-Батыс Қытай» транзиттік көлік дәлізі бойында «С» санатты сервистік қызмет көрсету нысаны жұмыс жасайтын болады. Аталған нысан Сапақ елді мекенінің тұсынан салынып отыр. Бұл ауыл тұрғындары жұмыспен қамтылады деген сөз. Бұл өңір үшін жол мәселесі де ешқашан қиындық тудырған емес. Өйткені, жанынан осы тас жолмен қоса, темір жол да өтіп жатыр. Қай саланың болмасын серпінді істерге жол ашатынын ауыл тұрғындары жақсы біледі. Бүгінде әркім өз бетінше әрекет етіп, мемлекет жасайтын мүмкіндіктерден құр қалмай келеді. Аудан әкімі есептік кездесудің кезекті сапарын осы Сапақ ауылдық округіне жалғады. Кездесу барысында алдымен учаскелік полиция инспекторының көмекшісі М.Жәкенов ауыл төңірегіндегі қылмыстық ахуалға тоқталды. Айтуынша, учаскелік аймақта 11 қылмыс дерегі тіркеліп, өзге де заң аясында көптеген құқық бұзушылықтарға қарсы жұмыстар жүргізілген. Мұнан соң, ауыл әкімі С.Әлмырзаев хабарлама жасады. Ауылдық округ көлеміндегі атқарылған жұмыстарға қаныққан аудан басшысы М.Оразбаев, ауданда жыл көлемінде жасалған жұмыстарды тұрғындарға таныстырып өтті. Осы ауылдық округке қарасты Көктем елді мекенінің өзекті мәселелерін көтере келген зейнеткер Қ.Көлов, ауылдағы ауыз су тапшылығын атқарушы биліктің назарына салды. Сонымен қатар, ауылға кіре беріс 4 жарым шақырымдық жолдың сапасы нашарлап, көліктер қозғалысына қиындық тудырып келе жатқандығын жеткізді. Бұл мәселені сол ауылдың тұрғыны Ә.Молжігітов те көтерді. Ал, Сапақ елді мекенінің тұрғыны, зейнеткер Ж.Жасанов аудан әкімінің есептік баяндамасына жақсы бағасын беріп, өзінің ризашылығын жеткізді. Көтерілген мәселелер алдағы жылдың еншісінде болатынын және осы жұмыстарды ұдайы назарда ұстайтынын айтқан аудан әкімі М.Оразбаев елдің тілегі қашанда ескерілетінін сеніммен жеткізді.
Алтынбек Бисенов.
