Толқын Tolqyn.kz ақпараттық агенттігі
» » Кәсіпкерліктің көкжиегі кеңейді

Кәсіпкерліктің көкжиегі кеңейді

Ақирек. Еңбек еткенге көл-көсір өнім беретін Ақбай алқабында өткен жылы алғаш рет күнбағыс егу ісі қолға алынды. Нәтиже жаман емес. Бүгінде балдай дәмді қауыны мен қып-қызыл қарбызы облысқа белгілі десек, артық емес. Былтыр қайнаған қызу тірлік бір мәрте толастамады. Әркім жанына жақын жұмысты қолға алып, түрлі салада еңбек етті. Мемлекет жасаған мүмкіндіктерден шет қалмай еңбек етуге ниеттілер баршылық. Солардың бірі-Г.Әлібаева. Ол бүгінде құс шаруашылығын қолға алып, екінің бірі бара бермейтін қадам жасап отыр. Бастамасы жаман емес. Қазіргі уақытта құс асыраумен айналысу үшін 16 млн. теңге несие алып, құс фермасын салып, электр жарығын және ауыз су жүйесін кіргізіп қойды. Міне, іргесі ілкімді істерге толы Ақбай өңірінде қылмыстық ахуалдың көрсеткіші де көңіл көншітерлік. Бұл жөнінде ауылдық учаскелік полиция инспекторы Д.Ысқақов айтты. Ауыл әкімі А.Ниязымбетовтың хабарламасынан соң, аудан әкімі М.Оразбав өткен жылы атқарылған жұмыстар жайын жан-жақты баяндады.
         Ауыл тұрғыны, зейнеткер Т.Жүсіпбаев ауылда электрик болып жұмыс жасайтын азамат қамбаштық екенін айтып, дер кезінде электрикті таба алмай қалатын кездер болатындығын атқарушы биліктің назарына салды. Зейнеткер Ә.Мейірманов ауылдағы 3 шақырымдық жолдың жайын қозғаса, ауыл тұрғыны А.Жалғасбаев Ақбай ауылы Бекбауыл дәрігерлік амбулаториясына қарайтынын айтып, осы мәселе ауыл тұрғындары үшін қиындық тудырып келе жатқандығын жеткізді. Өз кезегінде «Асхат» шаруа қожалығының төрағасы А.Қаныбетов шаруаны шығынға батырар зиянкестердің алдын алуда жедел жұмыс жүргізуге ықпал жасаған аудан әкіміне шаруалар атынан ризашылығын жеткізді.

Алтынбек БИСЕНОВ.
23 қаңтар 2018 ж. 1 769 0