Көше тазалығына жүрдім-бардым қарамаған жөн

Қазанға қарағанның қасығы бөлек болса да, азығы бір деген. Бәрінің илегені бір терінің пұшпағы. Өмір сүрер ортаның тазалығы. Қыс бойы сіз бен біздің көшеге тастаған қоқысымыздан көшелерді арылту керек. Бастысы, сіз бен біздің қоқысымыз.Қаламызда таза көшелер бар. Көшенің тұрғындары ұйымшыл ма, әлде көше комитеті ұсынықты қарекет ете ме, әйтеуір қысы-жазы бұл көше мұнтаздай болып тұрады. Не шашылып жатқан қоқыс жоқ, не қоқыс төгіп жатқан кісіні көрмейсіз. Бәлкім көше комитеті орайлы жұмыс істер, бірақ көше тұрғынның айнасы деп білетін бұл маңдағылар бірлікпен тірлік етеді. Ұйымдасқан түрде көшені таза ұстайды, өткен-кеткенге қоқыс тастатпайды. Бұл – мысал емес, көпке үлгі тірлік.
Әрине, "өз күніңді өзің көр" дегенді ұран еткендер тек өз дүниесін ғана таза ұстауға машықтанады. Оларға ортақ меншік деген ұғым жат. Әйтпесе, ауласындағы қоқысты көшеге ысыра салу кімге опа береді? Бізде қалыптасқан бір қасиет осы. Аулам таза болса, көшені тазалайтындар бар ғой.
"Көшесіне қарап тұрғынын таны" деген тәмсіл бар. Ал тазалық бұл нақылдың құрамдас бөлшегі. Сіздің көшеңіз – сіздің айнаңыз. Үйдегі айнаның бетін ағал-жағал күйде қоймайсыз ғой. Жалтырап тұруы үшін жиі бетін сүртесіз. Сол сықылды көшенің де тазалығын ойлап қойған абзал.
Ә. Танымбетов
Арал қалалық ардагерлер кеңесінің төрaғасы