Жарықтың игілігін жұрт көреді

Аудан әкімдігінің ауыл тіршілігі мен тұрмысына қатысты басқа да түрлі жиындарында тұрғындар тарапынан жиі көтерілетін тақырыптың бірі – көшелерді жарықтандыру мәселесі. Ауызсу, жол салалары секілді қала мәдениеті мен көркінің ажырамас бөлігі болып есептелетін көше жарығының да маңызы ерекше екенін осыдан анық байқауға болады.Міне, мұндай мәселе ауданда да бары жасырын емес. Әсіресе соңғы жылдары жарықтандыру жұмыстары төңірегіндегі мәселе қордаланып қалған болатын. Жақында аралдықтарды жағымды жаңалық қуантып тастады. Биыл жарықтанатын көшелердің қатарынан өз көшесін байқаған тұрғындардың қуанышында шек жоқ. Солардың бірі қала тұрғыны Мырзағұл Қанатов:
– Көшенің жарығы қай кезде де тұрғындардың басты сұранысында болған дүние еді. Расында көшенің бойында самаладай самсаған жарықтың болғанын кім қаламайды дейсің?! Әсіресе қыс мезгілінде жарықтың игілігі халыққа қажет-ақ. Жарық жүйесі тіптен іңір қараңғылығы түскенде іске қосылып, жолаушыға жол сілтеп, мектептен қайтқан оқушыларға табан жолын көрсетіп қана қоймай, түнгі уақытта адамдар қауіпсіздігіне де қорған болады. Көшелерді жарықтандыру үшін қауіпсіз әрі тиімді энергия қондырғыларын енгізу маңызды әрі басымдыққа ие болатындығы сондықтан. Яғни, көше жарығы әр ауылдың ғана емес, әр көшенің сәні және тұрғындардың қауіпсіздігінің кепілі, – дейді.
Иә, уәде орындалуымен құнды. Алдағы уақытта аралдықтарға жарықтың тиімділігін көру бақыты бұйырарына сенім мол. Бастысы ел естіген жан семіртер жақсы жаңалық сылдыр сөз, құрғақ уәде күйінде қалмаса болғаны.
«Толқын» ақпарат