Бос қалбырдан бұйым жасаған

Қоғамның, айналаның тазалығы, әлбетте, бірінші кезекте адамзат баласының жауапсыздығынан ластанады. Расында, солай. Біз күнделікті тұтынатын заттардың қалдығы бүгінгі таңда қоқыстың қордалануына басты себеп болып отыр. Қарапайым ғана энергетикалық сусындардың қауырсыны да осындай қиындық тудырып келеді. Кез келген дүкеннен табылатын бұл сусындарды шөліңді қандыру үшін қиналмай таба аласыз. Бірақ «шөл қанды, қоқыс қалды» болып келе жатқаны жасырын емес.

Бірақ осы қиындықты да жеңуге болады. Тек жеңіп қана қоймай, кәдеге асыруға болатынын дәлелдеп жүрген азамат ортамызда жүр. Ол жерлесіміз, №71 мектептің көркем еңбек пәнінің мұғалімі – Нұржан Балов.

Бұл азамат жайлы осыған дейін де талай естіген боларсыздар. 15 жыл ұстаздық етіп келе жатқан азамат өзінің шеберлігімен, өнерімен көпшілікті таң қалдырудан жалыққан емес. Суретшілігінен бөлек, тастан түрлі бейне жасап, оларды бояп, сан алуан керемет дүниелер жасап келеді. Ал бүгінгі біздің куә болғанымыз, тіпті тамаша.

Нұржан қазірде зергерлік бұйымдарын жасаумен айналысып жүр. Ол үшін бар болғаны жоғарыда біз айтқан қалбырларды кәдеге жаратуда төзімділік пен үлкен еңбек болса жеткілікті.

Иә, кәдімгі энергетикалық сусын Gorilla-ның босаған қалбыранан жасаған дүниелері көздің жауын алады. Жақында ғана №262 мектеп-гимназиясында ұлттық құндылықтарды дәріптеу мақсатында өткен облыстық семинарда көрмеге қойылған Нұржан Ертөреұлының туындылары талайға таңдай қақтырды.

Қарапайым ғана сырға, сақинадан бастап шашбау, білезік, белдік секілді дүниелердің қатарына бүгінде арнайы тойға тарту ретінде ұлттық нақыштағы киіз үй формасындағы сувенирлер де қосып жатыр.

Міне, он саусағынан өнер тамған азаматтың бұл еңбегін айтпай кетуге болмады. Құндылықтарды дәріптеп қана қоймай, қоғамға пайдасы мол жаңалықпен айналысып жүрген жерлесімізге табыс тілейміз.

О.ЖОЛДАСОВ