Кісінің көлігін айдап кеткен

Арал аудандық сотында Қазақстан Республикасының Қылмыстық кодексінің 200-бабының 1-бөлігімен айыпталған Т-ның қылмыстық ісі қаралды.Сотта анықталғандай, сотталушы Т. 14 шілде 2023 жылы өзінің тұрғылықты жері Алматы қаласына қайту үшін қалааралық жолаушыларды тасымалдайтын таксилер тұрағына бара жатып, Арал қаласы, М.Нұржаубаев көшесінде тұрған жәбірленуші Ж-ның «Tоyota сamry» маркалы автокөлігін көріп, Қызылорда қаласына дейін жетіп алу ниетімен, жымқыру мақсатынсыз автокөлікті айдап кетіп, Қармақшы ауданындағы Қорқыт ата станциясына баратын жолдағы темір жол жиегіне қалдырып, әрі қарай оқиға орнынан бой тасалап кетіп қалған.
Сотталушының кінәсі өзінің, жәбірленушінің жауаптарымен, заттай дәлелдемелерді қарап тексеру және алу хаттамаларымен, сондай-ақ іс бойынша басқа да дәлелдемелер жиынтығымен дәлелденген.
Қылмыстық заңнамаға сәйкес, бұл қылмыстық әрекет онша ауыр емес қылмыстар санатына жатады.
Сот үкімімен Т. ҚР ҚК-нің 200-бабының 1-бөлігімен кінәлі деп танылып, 6 айға бас бостандығын шектеу жазасы тағайындалып, ҚК-нің 60-бабының 1-бөлігі қолданылып, бұған дейін Алматы қаласының №2 Медеу аудандық сотының 27.06.2023 жылғы үкімімен тағайындалған жазаның өтелмеген бөлігі ішінара қосылып, түпкілікті 1 жылға бас бостандығын шектеу жазасы тағайындалып, сол мерзімге пробациялық бақылау белгіленген.
Сотталушының қылмыстық жауаптылығы мен жазасын жеңілдететін мән-жайларға сот оның кінәсін толығымен мойындап, жасаған әрекетіне шын ниетпен өкінуін, жәбірленушінің кешірімін, сондай-ақ келтірілген мүліктік шығынның қалпына келтірілгенін жатқызған.
Үкім заңды күшіне енбеген.
Арал аудандық соты