Әр ауылда көкжиектер жайқалса
Жапырақ жайған ағаштар - елді мекендердің сәні. Адамдар тіршілік ететін ортаның нәрі. Көкке оранған ауылдарды көргенде «Шіркін-ай, осындай жерлер көбейе берсе екен» деп іштей ойлап қоясың. «Атадан мал қалғанша, тал қалсын» деген де халықтың бір даналық сөзі бар. Міне, осы ойлар көңілге оралған кезде менің есіме үнемі Сырдарияның жағасындағы Аманөткел ауылы еске түседі.Аманөткел ауылының ажарын ашып тұрған, сәнін келтіріп тұрған осындағы жайқалған көкжелекке оранған алқап. Оны жергілікті жұрт, ел-халық «Шындалының бағы» деп атап кеткен. Шынымен де, екінің бірінің қолынан келе бермейтін осынау көгалды аймақты жасаған осы ауылдың тумасы, төл перзенті, бүгінде қадірменді қарты Шындалы Әбдіраманов екенін білеміз.
Жоғарғы оқу орнын бітіріп, мамандық алып, Атаншиде, Тоқабайда, Жаңақұрылыста, Аралда ауылшаруашылығы саласында елеулі еңбек еткен азамат сыртта ұзақ жүрсе де, туған жерге оралып, осынау бақты отырғыза бастаған екен. Айналасы аз жылда ол еккен жас талдар тамыр жайып, жайқалып өсіп, бірте-бірте үлкен баққа айналды. Енді міне, ауылдың сәні болып қана қоймай, үлкен жолмен өткен жолаушылардың көзі мен көңілін сүйсіндіріп отыр. Осындайда арқалы азамат Шындалы Әбдірамановтың игі ісіне алғыс айтқың келеді.
Жақында Сырдың бойындағы ауылдарға барған сапарымда Шындалы бағын тағы да көрдім. Көкпеңбек болып ну орманға айнала бастапты. Сондағы ойым: Аралдың әрбір ауылында осындай көк желектер жайқалып тұрса екен дейді. Туған жеріне қызмет еткен жанның тірлігі міне осындай болса керек-ті.
Иә, Шындалы малшаруашылығы саласында мықты маман болып, аты шығып, атағы дүркіреп тұрды. Сол еңбегі еленіп, Арал ауданының Құрметті азаматы атанды. Қаншама мемлекеттік марапаттарға ие болды. Енді елге сыйлы азамат осы Аманөткелдің батагөй қарты. Көпті көрген Шәкең белгілі журналист Жұмабай Жақып екеуі «Құт қонған, жыр қонған Аманөткел» атты қалыңдығы кереқарыс кітап шығарып, кейінгі ұрпаққа аманаттады.
«Әке көрген оқ жонар» дегендей-ақ Шәкеңнің жолын баласы Қайрат абыройлы жалғап келеді. Ол бүгінде осы Аманөткел ауылының әкімі. Ал тағы бір баласы Қарашалаң мектебінде директор. Олардың да әке жолын жалғастырып, халқының нағыз жанашырына айналатынына сеніміміз мол.
Жеткерген ЖАСАНОВ,
еңбек ардагері.
