Азаматтық іс медиация тәртібімен реттелді

Арал аудандық сотында талап қоюшы Ж-ның жауапкер К-ден 60 000 теңге және өкіл көмегіне төленген 6 000 теңге өндіру туралы азаматтық ісі қаралды.Талап қоюшы талабында, 2018 жылдың мамыр айында жауапкерге 60 000 теңгеге үйінің төргі бөлмесіне керілмелі төбе жасатқанын, алайда екі ай ішінде керілмелі төбенің өзінен-өзі жыртылып қалғанын, сондықтан жауапкерден төлеген ақшасын өндіріп беруді сұраған.
Тараптар сот талқылауы барысында дауды медиация тәртібімен реттеу туралы келісімге келген.
Медиациялық келісімге сәйкес, жауапкер талапты мойындап, талап қоюшының қонақ бөлмесіндегі керілмелі төбесін ағымдағы жылдың қараша айының 25-не дейін жөндетіп беруге міндеттенген, ал талап қоюшы келісім талаптарын қабылдап, қойған талабынан бас тартқан.
Дауды медиация тәртібімен реттеу туралы келісімнің заңға қайшы келмейтіні, келісім шарттарының орындалуы басқа тұлғалардың құқықтары мен заңды мүдделерін бұзбайтыны ескеріліп, келісім сот ұйғарымымен бекітіліп, іс бойынша іс жүргізу тоқтатылды. Талап қоюшыға төленген мемлекеттік баж алымы қайтарылды.

Арал аудандық сотының
баспасөз қызметі