Қызметкерлер арасында тартысты ала доп додасы мәресіне жетті

Балық шаруашылығы өндірісінің құрылғанына 100 жыл толуына орай аудан көлемінде өтіп жатқан дүбірлі той мемлекеттік мекеме мен кәсіпорын қызметкерлері арасында өткен кіші футбол турнирінің финалдық бәсекесімен ұштасты.

Ала доп додасына 8 команда қатысып, топтық кезеңде өзара бақ сынады. Іскерлік әлемінде адал еңбегімен абыройы асқақтаған мемлекеттік қызметкерлер спорт бәсекесінде де өздерінің шын мықты екендіктерін танытты.

Нәтижесінде жүлделі 3-орынмен Обаға қарсы күрес станциясы, 2-орын Арал аудандық төтенше жағдайлар бөлімі ие болды. Ал барлық бәсекеде озық ойын үлгісін көрсеткен Арал аудандық көпбейінді орталық аурухана командасы жүлделі 1-орынды жеңіп алды.

Турнирге қатысып, жүлдегер атанған командаларға аудан әкімінің орынбасары Н.Бохаев қаржылай сыйлық сертификаттары мен арнайы кубоктар және Алғыс хаттар табыстады.

Балықшы мерейін тасытар ауқымды шаралар легі кешкілік бірқатар өнер жұлдыздары мен аудан өнерпаздарының қатысуымен өтетін арнайы гала-концертке ұласады.