МАЛ ШАРУАШЫЛЫҒЫН ӨРІСТЕТКЕН АУЫЛ
Аудан әкімінің тұрғындар алдындағы есепті кездесуі Сазды ауылдық округінде жалғасты. Алдымен ауылдық округтің учаскелік полиция инспекторы Қаражанов Қайырбай өткен жыл көлемінде атқарған жұмыстарына тоқталды. Одан соң ауылдық округ әкімі Әділхан Танымбетов ауыл тынысы мен есепті мерзімде округтің қол жеткізген табыстарын баяндады.Жиында сөз алған аудан әкімі Мұхтар Оразбаев аудан бойынша 2019 жылы атқарылған жұмыстарды кеңінен баяндап, алдағы жоспарлармен бөлісті. Сонымен қатар, өңірдің экономикалық-әлеуметтік дамуының маңызды мәселелерін сөз етіп, мемлекеттік бағдарламалар бойынша жүзеге асырылып жатқан ауқымды істердің жайынан көпшілікті құлағдар етті.Сазды ауылының тұрғындары негізінен мал шаруашылығымен айналысады. Өткен жылы «Агробизнес» бағдарламасымен «Кемаладин» шаруа қожалығы 31 бас жылқы алса,«Іскер» бағдарламасы бойынша 5 кәсіпкер жылқы, сиыр малдарын алып, санын арттыру үшін жұмыс жасауда. Сондай-ақ, «Сыбаға» бағдарламасымен «Нұрбақыт» шаруа қожалығы кәсіпкерлік мақсатта 200 бас қой, ал «Нұр» шаруа қожалығы 82 бас қой алып,бағып-өсіруде.
Округ бойынша 17 жеке кәсіпкер халыққа қызмет жасауда. Екі кәсіпкер автобуспен «Сазды-Арал» бағытында қатынап, жолаушыларды тасымалдау қызметін көрсетуде. «Бастау-Бизнес» бағдарламасы арқылы кәсіпкерлік негіздерін 3 азамат оқып шығып, сертификаттарын алған.
Кездесу соңында ауыл тұрғындары аудандағы атқарылған жұмыстарға оң баға беріп, өздерінің ұсыныс-пікірлерін білдірді.
