Алғашқы сессияда жаңа депутаттық құрам анықталды

15 қаңтар күні VІІ шақырылған Арал аудандық мәслихатының бірінші сессиясы өтті. Оны аудандық сайлау комиссиясының төрағасы Тәңірберген Дәрменов ашып, хабарлама жасады.Мұнан соң сессия отырысында аудан әкімі Мұхтар Оразбаев жаңадан сайланған депутаттардың алдағы жұмысына табыс тілеп, ел ертеңін еңселі ету жолында аянбай еңбек етуге шақырды. Сондай-ақ аудан басшысы республикамызда көрініс тапқан саяси науқанға белсене қатысып, түрлі партияға өз таңдауларын жасаған аралдықтарға алғысын жеткізді.Осы жерде мемлекеттік Әнұран шырқалып, сенімге ие болған халық қалаулыларына зор қошеметпен депутаттық куәліктер тапсырылды. Күн тәртібінде қаралған мәселе аясында жиналғандар көкейінде жаңа депутаттық құрамды басқаратын мәслихат хатшысы қызметіне кім тағайындалады деген сауал тұрды. Көп ұзамай ол сауалдың да жауабы табылып, депутат, №19 орта мектептің директоры Саягүл Махашова әріптестері алдында мәслихат хатшысы қызметіне Базарбай Төрахметовтың кандидатурасын ұсынып, өз ойын ортаға салды. Сессияға қатысушы жаңа құрамдағы депутаттар бұл ұсынысты бірауыздан қолдады.

Бұдан кейінгі күн тәртібіне енген мәселелер бойынша аудандық мәслихаттың тұрақты комиссияларын құру, аудандық мәслихаттың тұрақты комиссияларының құрамын бекіту және олардың төрағаларын сайлау, аудандық мәслихаттың кезекті екінші сессиясының төрағасын сайлау жайы талқыланып, аталған жайттар депутаттар тарапынан қолдау тапты. Сосын аудандық мәслихаттың «Nur Otan» партиясының депутаттық фракциясын тіркеу туралы «Nur Otan» партиясы Арал аудандық филиалы төрағасының бірінші орынбасары Т.Қанатов хабарлама жасады.

Иә, аудандық мәслихаттың депутаттық құрамы жаңарды. Жұртшылық тарапынан лайықты бағасын алып, партия сеніміне ие болған депутаттар алдында аудан әкімі бұрынғы мәслихат хатшысы, бүгінгі мәслихат депутаты Дәуренбек Мадиновке Алғыс хат табыстап, аудан экономикасын өркендету жолында атқарған өлшеусіз еңбегіне алғысын білдіріп, иығына шапан жапты.

Жалпы, жаңа жылдың алғашқы онкүндігінде ұйымдастырылған саяси дода жоғары деңгейде өткізілді. Ашықтықты басты бағыт еткен мемлекетіміз бұл жолы да әлемдік деңгейдегі саяси аренада өзін мойындата алды. Бұл сайлаудың бір ерекшелігі, әйелдер қауымына, іскер жастарға, елжанды азаматтарға айрықша көңіл бөлінгені еді. Расымен де. бізге белгілі болғандай, Мәжіліс пен облыстық мәслихат депутаттығында жоғарыда тілге тиек еткендей нәзік жандылар мен жалынды жастарға сенім артылғанын анық аңғарамыз.

Аралда да солай. Аудандық мәслихаттың депутаттығына үміткер ретінде тіркеліп, сайлау қорытындысымен халық қалаулысы атанған ардақты аналар, іскерлік қабілетімен дараланған жас буынға зор сенім артылды.