Барсакелмес қорығы ЮНЕСКО-ның Әлемдік және мәдени мұра тізіміне енбек

tolqyn.kz Халықаралық табиғат қорғау одағының Халықаралық сарапшылары Барсакелмес мемлекеттік табиғи қорығына «Тұран шөлдері» номинациясы бойынша ЮНЕСКО-ның әлемдік табиғи және мәдени мұра мәртебесін беру бойынша далалық бағалау жұмыстарын жүргізді.  Бағалау кезінде сарапшылар  Барсакелмес мемлекеттік табиғи қорығының  «Барсакелмес», «Қасқақұлан» және «Дельта» учаскелерінде болып, олардың ерекшеліктерімен танысты.
Сондай-ақ Барсакелмес мемлекеттік табиғи қорығының Арал қаласындағы кеңсесінде қорытынды жиын өткізіп, қорық ұжымымен кездесті.Кездесуге Арал аудандық кәсіпкерлік, өнеркәсіп және туризм бөлімінің бас маманы Т. Бекболов, «Арал әйелдері» ҚБ-нің төрайымы Б.Жүгінісова, «Арал қаласы бойынша мүмкіндіктері шектеулі мүгедектерді қорғау және қолдау» ҚБ-нің мүшесі  Қ.Аяпов қонақ ретінде қатысты.

Кездесу барысында  Барсакелмес қорығының бас директоры Х. Қаниев қонақтарға қорықтың жұмыс атқарған жұмыстары туралы түсіндіріп өтті. Сондай-ақ биосфералық резерват жөніндегі бірнеше мәселелер талқыланды. Алдағы уақытта қажетті құжаттамалар әзірленіп Барсакелмес қорығы ЮНЕСКО-ның Әлемдік және мәдени мұра тізіміне ұсынылатын болады.

"Толқын" ақпарат