"Толқынды Арал" көрмесі

Қылқалам құдіретін түсінетін қауым үшін өнерден артық өнеге жоқ. Ойындағысы мен бойындағысын таланты арқылы танытып жүретін қауым үшін сурет әлемі бір бөлек. Биыл сол суретші қауым үшін мерейлі шақ. Өйткені осы жылы Қазақстан Республикасының Суретшілер одағының құрылғанына 90 жыл толып отыр. Ғасырға жуық қылқалам құдіретін мойындатып, осы рухани өнерді өлтірмей келе жатқан ұрпақтар сабақтастығы бұл күнде әлі жойылған жоқ. Жойылмайды да. Осы бір 90 жылдық торқалы белеске орай ҚР Суретшілер және Журналистер одағының мүшесі, Арал өңірінің тумасы Көлбай Әбілханұлының «Толқынды Арал» атты шығармашылық көрмесі өтті.

Аталмыш көрменің ашылуына аудан әкімінің орынбасары К.Бержанов қатысып, қылқалам шеберінің туған жеріне келіп, төл туындыларын көпшілікке ұсынғандығына ризашылығын жеткізіп, аудан әкімінің Алғыс хатын табыс етті.

Одан соң ҚР Суретшілер одағының мүшесі Б.Бөкешов сөз сөйлеп, көрменің ашылуымен барша аралдықтарды және осы салада рухани байланыс орнатып келе жатқан барша қолөнершілерді құттықтады.

Арал өңірінде дүниеге келген Көлбай Әбілханұлы осы өлкеде ұстаздық қызмет атқарды. Кейінірек Қызылорда қаласында суретшілер шеберханасында жұмыс жасап, шеберлігін шыңдай түседі. Оның жазған ертегілері, әзіл суреттері республикалық басылымдар арқылы елімізге танылды. Қазір зейнет жасында болса да өнерден қол үзбей келеді. Көрмеде белгілі өнер иесінің майлы бояумен, акварельмен салынған және графикалық түрдегі 70-ке жуық туындысы қойылды. Көлбай Әбілханұлы шығармаларына негізінен туған жері мен жерлестерін арқау еткен.

«Толқын» ақпарат