Мемлекет қолдауын сезініп келеміз

Бүтін бір отбасының түтінін түтетер отанасы болған соң бала сүйіп ана бақытына кенелгенге не жетсін. Шүкір, бүгінде коп баланы өмірге әкеліп, солардың қызығын көріп отырған жанның бірі өзіммін. Жұбайым дүние салды. Осы балаларым қандай болып ер жетеді екен, ата-ананың үмітін ақтай алар ма екен деген ой жиі мазалайтын. Тәубе балаларым бірін бірі демеп күн кешіп жатырмыз. Өзім жолдасымның қалдырып кеткен қара шаңырағында кішкентайларымды қарап отырған жалғыс басты анамын. Бүгінде еліміздегі бейбіт заманның арқасында балаларым әр жақта еңбек етіп жатыр. Ал мен солардың тілекшісі болып шаңырақта отырмын. Тәуелсіз еліміздің бүгіні жақсы деп айта аламын. Келешегіне де сеніммен қараймын. Отбасы болған соң қиындықтар кезікпей тұрмайды ғой. Кейде балалардың киімі, тамағы дегендей кішігірім кедергілер кезігіп тұрады. Осы ретте асыраушысынан айыралғандарға үкіметтен берілетін қаржылай көмектің біраз мәселелерді реттеуге септігін тигізіп тұрғандығын айтпай кетуге болмас. Ал бала күтіміне келер болсақ ел билігі бұл мәселені де назардан тыс қалдырмайды деп білеміз. Жақында теледидардан еліміздегі еңбек және халықты әлеуметтік қорғау министрлігі бала күтімі бойынша берілетін жәрдемақыны төлеу мерзімін ұлғайту туралы мәселені көтеруді жоспарлап отырғандығынан хабардар болдық. Ол туралы аталған саланың вице-министрі С.Жақыпова мәлімдеген еді. Ол министрліктің барлық ұсынысы мен жаңашылдығы елдің экономикалық мүмкіндіктеріне қарай жүзеге асатынын айтты.
– «Еңбек және халықты әлеуметтік қорғау министрлігі декреттік демалыста отырған әйелдерге жәрдемақы төлеу мерзімін ұлғайту туралы мәселені бірнеше рет көтерген болатын. Белгілі бір есептеулермен республикалық бюджеттік комиссияға өтінім бердік. Тағы да қайталап айтамын, бүгінгі таңда барлық ұсыныс пен жаңашылдық елдің экономикалық мүмкіндіктеріне тәуелді. Әзірге бұған қатысты оң жауап болған жоқ. Қазір тағы да негіздеп, өтінім береміз»,-деді Жақыпова Астанадағы трагедияға қатысты түсініктеме берген кезде. Бүгінде еліміз бойынша ана мен балаға берілетін көмектің барынша тиімді шарттары қарастырылып жатқандығынан хабардармыз.
Иә, жаңарау мен жаңғыру жолында көптеген бастамаларды жүзеге асырып жатқан мемлкет басшысы биылғы жылы басымдық алатын басты мәселені өзінің 2018 жылдың 5 қазанында жолдаған Жолдауында айтып өтті. Ол халық табысы мен тұрмыс сапасын арттыру болатын. Биылғы жыл біз үшін сонысымен де ерекше. Бастысы еліміз тыныш, тәуелсіздігіміз мәңгі болсын.
М.Әбиева,
«Күміс алқа» иегері, батыр ана.