Қызылорда қауіпсіз аймақтар қатарында
Облыстық полиция өткен жылы қоғамдық қауіпсіздікті қамтамасыз ету, азаматтардың құқықтары мен бостандығын қорғау бағытында нақты нәтижелерге қол жеткізді.Аталған ведомство қылмыстық құқықбұзушылықтар 2 пайызға төмендегенін атап өтті. Қоғамдық орында (12,5 пайыз), көшеде (6 пайыз) жасалған қылмыстар саны да азайды, 10 мың тұрғынға шаққандағы құқықбұзушылық деңгейі республика көлемінде 57 болса, өңірімізде 32-ні көрсетті. Бұл – Қызылорда қауіпсіз аймақтар қатарында екеніне дәлел.
– Ауыр санаттағы қылмыстар, оның ішінде адам өлтіру, денсаулыққа ауыр зиян келтіруге жол бермеу бағытында жүйелі жұмыс атқарылды, осы санаттағы қылмыстар толық ашылды. Ұрлық, оның ішінде пәтер ұрлығы және тонау азайып, мал ұрлығы 2024 жылғы көрсеткішпен бір деңгейде болды. Кейінгі 3 жылда ұрлық саны 63 пайызға төмендегенін байқаймыз. Бұл профилактикалық шараларды күшейтумен, бейнебақылау аясының кеңеюімен байланысты, – деді облыстық полиция департаментінің бастығы, полиция полковнигі Серік Ергешов.
Тәртіп сақшылары алаяқтықтың жаңа тәсілдері мен оған қарсы жаңа заң нормаларын халыққа кеңінен түсіндіргенімен, арам ниеттілердің торына түскендер азаймай тұр. Өңірде, әсіресе, интернет алаяқтық саны өскен. Қылмысты ашу көрсеткіші жөнінен Қызылорда республика бойынша алдыңғы орыннан көрінді. Алаяқтық белгілері бар 7 мыңға жуық сайт пен сілтеме анықталып, бұғаттау үшін олар «Кибербақылау» жүйесіне енгізілді.
– Отбасындағы қылмыстың басым бөлігі мас күйінде жасалатынын талдау нәтижесі көрсетті. Осыған байланысты «мүлдем төзбеушілік» қағидаты аясында жұмысты күшейттік. Маскүнемдерді еріксіз емдеу мекемесіне жатқызу, қорғау нұсқамалары мен мінез-құлқына ерекше талап белгілеу бағытындағы іс-шаралар жанданып, мас күйінде жасалған қылмыстар саны азайды. Әлеуметтік топ өкілдері арасында профилактикалық жұмыс қарқын алды. Медициналық ұйымдармен, әлеуметтік қызмет орындарымен өзара байланыс нығайды. Жасөспірімдер арасындағы құқықбұзушылықтың алдын алу да басты назарда. Былтыр біз олардың құқықтық сауаттылығын арттыру мақсатында білім беру ұйымдарында 10 мыңнан астам кездесу өткіздік. Күнделікті «Түнгі қала», «Квадрат» рейдтері жүргізілуде, – деді С.Ергешов.
Кешенді профилактикалық іс-шаралардың күшейгеніне қарамастан өткен жылы жол-көлік оқиғаларының саны 47,9 пайызға (978-ден 1446-ға) өсті. Одан 109 адам қаза тауып, көрсеткіш 5,8%-ға, жарақат алғандар саны 54,9%-ға (1247-ден 1932-ге) артты. Талдау нәтижесі көбіне жүргізушілердің жол ережелерін сақтамауы жол-көлік оқиғаларына әкелетінін көрсетті. Атап айтқанда, жолда жүру ережесін бұзудың 305 мыңға жуық дерегі анықталса, оның 176 мыңнан астамы — жол апатына тікелей әсер ететін өрескел құқықбұзушылықтар. Осыған байланысты қауіп-қатер жоғары учаскелерге, адамдар шоғыры көп жаяу жүру өткелдеріне кезекшілік қойылды.
Өңірде жол қозғалысы ережелерін бұзуды автоматты түрде анықтайтын стационарлық жүйе желісі кеңейді. Жаяу жүргіншілердің қауіпсіздігін қамтамасыз ету мақсатында қосымша 10 Sunqar құрылғысы іске қосылды. Одан бөлек, бейнебақылау қондырғыларының саны көбейді. Қазіргі таңда облыс орталығы мен барлық аудандық полиция бөлінісіндегі жедел басқару орталықтары 888 бейнебақылау камерасымен қамтылған. Штаттық режимде жұмыс істеп тұр. «Қауіпсіз қала» жобасы аясында облыс орталығына 1400 бейнебақылау камерасы, 20 зияткерлік қиылыс, 58 стационарлық жылдамдық өлшегіш орнатылды. Қазіргі күні оларды іске қосу бағытында жұмыс атқарылып жатыр.
Халықпен кері байланыс орнату мақсатында департаменттің барлық деңгейдегі басшылары азаматтарды күнделікті қабылдайды.
– Қабылдауға келген азаматтардың бірде-бір мәселесі назардан тыс қалмайды. Қоғамдық қауіпсіздікті қамтамасыз ету, азаматтардың құқықтары мен бостандығын қорғау бағытындағы жүйелі жұмыс жалғасады. Заңдылық пен тәртіпті сақтау басты міндет болып қала береді, – деді департамент бастығы.
Назерке САНИЯЗОВА,
«Сыр бойы»
