«СУРЕТТЕР СЫР ШЕРТЕДІ» МҰРАЖАЙЫ ҚАЙТА ЖАҢҒЫРДЫ

Былтыр көк теңіздің айдынынан шабыт алып, тереңінен маржан сүзген, асау Аралдың толқынынан бойына рух сіңіре білген теңізбен тағдырлас талант иесі, Аралдан шыққан тұңғыш министр, мемлекет және қоғам қайраткері, Арал ауданының құрметті азаматы Құдайберген Саржановтың туған жердің тарихы мен танымын айғақтайтын, мұрасын ұлықтайтын жеке мұражайы ашылған болатын.Биыл осы ғасырданда ұзақ жылға жалғасар, елдің мұрасына айналар жеке мұражайдың қоры кеңейіп, жасақталып, халықтың игілігіне қайта ұсынылуда. Осы орайда, бүгін Сыр өңірінде абыроймен еңбек еткен, ел мүддесі жолында аянбай тер төккен, еліміздің балық шаруашылығы саласының дамуына айтулы үлес қосқан Қазақ ССР Балық шаруашлығының министрі, мемлекет және қоғам қайраткері Құдайберген Саржановтың «Суреттер сыр шертеді» атты мұражайында тағылымды шара өткізілді.
Игілікті шараға аудан әкімі М.Оразбаев арнайы қатысып, Тұңғыш Президентіміз Н.Назарбаевтың «Болашаққа бағдар: рухани жаңғыру» атты мақаласы аясында «Туған жер» бағдарламасын іске асыру бағытында ашылған мұражайдың маңыздылығына тоқтала отырып, келешек ұрпаққа өз өлкесін таныту жолында бұл ғимараттың орны ерек, аса құнды дүние екендігін тілге тиек етті.
Одан әрі мұражайды тамашалауға келген аудан қонақтары туған жеріміздің, еліміздің тарихынан сыр шертетін кітаптар мен жазбаларды көріп, ризашылық пікірлерін білдіріп өтті.
Шара барысында Арал аудандық атқару комитетінің төрағасы, Партия комитетінің бірінші хатшысы болған Б.Ақпанбетов пен Қазақстан Журналистер одағының мүшесі, ардагер журналист Ш.Дәрмағамбетов сөз алып, осындай құнды, тарихи мұражайдың кеңейтіліп, жасақталып жатқаны құптарлық іс екенін атап, ізгі лебіздерін жеткізді.
Өз кезегінде Қ.Саржанов та сөз тізгінін алып, Рухани мұралардан сыр шерткен шара қонақтарын мұражаймен таныстырып, біршама құнды материалдармен толықтырылған мұражай төрт бөлімнен тұратынына тоқталып өтті.
Аудан әкімінің баспасөз қызметі