Журналистиканы неге таңдадым?

Менің ойымша адам баласының арманы өзімен бірге өседі, өзгереді. Бала кезімнен арманым – журналист болу және мен өз арманыма жету жолындамын. Бала күнімнен теледидар төрінде жүрген беделді азаматтарға қарап қызығушы едім, ендігі кезек өзіме келді. Қазіргі уақытта, жоғары білім беретін Қорқыт Ата университетінің жоғарғы курсында тәлім алудамын. Енді бір қадам аттасам, ордалы білім ошағын тәмамдамақпын. Журналист – мен үшін өмірдегі ең мәртебелі, қиын да қызық мамандық. Көп ізденісті, ерінбей тер төгуді қажет ететін мамандық иесі. Халықтың жоғын жоқтап, мұңын тыңдап, қоғамның күрмеуі шешілмеген мәселелерін көтеріп, шешім табуына атсалысып жүрген өз ісінің нағыз шеберлерін көргенде сол азаматтардың ізімен жүріп, тіпті, заманауи талаптарды орындауда олардан да асып түскім келеді.

Бұл саланы таңдауыма түрткі болған өзімнің бойымдағы талантым дер едім. Жаратқан анамның сүті, әкемнің қанымен дарытқан өнерім мен дарынымды одан әрі шыңдап, елімнің дамуына үлесімді қосқым келеді. Қазақ елінің бір тұлғасы ретінде қалыптасуды парызым санаймын. Білім алған алтын ұям мен ұстаздарымның жүзін жерге қаратпауға барынша тырысудамын.

Журналист тыңдарманды өз сөзіне сендіруі және шындыққа тура қарауы керек. Сол үшін әуелі өзіне-өзі сенімді болуы керек. Оның сенетіні – өзінің бойындағы білімі, қабілеті, рухани деңгейі.

Халық пен билікті байланыстырушы көпір саналатын мамандық иесінің қоғамдағы рөлі ерекше. Журналист – алып күш, ашық пікір, шынайы мінез, тұңғиық ой, талғампаз көзқарасы анық көрінетін ерекше мамандық иесі. Тілшілер қауымын «төртінші билік» өкілдері деп те атайды.

Ахмет Байтұрсынұлының сөзімен келтірсем: «Халықтың көзі, құлағы һәм тілі». Міне, сондықтан, болашақта қоғамға қажетті маман иесі ретінде арманымның орындалғанын шынайы ниетіммен қалаймын. Болашақта өз ісімнің шебері болып, өз саламның шыңына жетемін деген үмітім бар.

М.Талғатқызы,

Қорқыт Ата атындағы Қызылорда университетінің студенті